«Աժ կանոնակարգ» օրէնքում փոփոխութիւններ անելու մեծ աղմուկ հանած օրինագծի օգտին կողմ քուէարկեցին խորհրդարանական 3 ուժերը, այդ թւում նաեւ Դաշնակցութիւնը: Երբ Նիկոլ Փաշինեանի կոչից յետոյ ժողովուրդը շրջափակեց Աժ-ի շէնքը, ՀՅԴ-ն յայտարարեց, որ յետ է կանչում իր նախարարներին, եւ դուրս եկաւ քոալիսիոնից: «Ժողովուրդ» օրաթերթը այս եւ մի շարք այլ հարցերի շուրջ զրուցել է ԱԺ ՀՅԴ խմբակցութեան քարտուղար Արմէնուհի Կուրեղեանի հետ:
«ԺՈՂՈՎՈՒՐԴ».- Տիկին Կուրեղեան, օրերս Աժ-ում տեղի ունեցած այդ միջադէպը սպասելի՞ էր Ձեզ համար:
ԱՐՄԷՆՈՒՀԻ ԿՈՒՐԵՂԵԱՆ.- Երբ որ վարչապետը ֆէյսբուքեան ուղիղ եթերում կոչ արեց հաւաքուել Աժ-ի մօտ, սպասելի էր, որ նման բան տեղի կ՛ունենայ: Մինչ այդ, ի հարկէ, սպասելի չէր: Նախորդ օրը յանձնաժողովում քննարկել ենք այդ հարցը: Յաջորդ օրը հերթական նիստով քննարկել ենք: Դա օրակարգային հարց է եղել, քննարկումը սովորական ընթացել է, «Ելք»-ի պատգամաւորներն էլ ներկայ են եղել: Պարոն Բաբլոյեանը յայտարարեց, որ մնանք շէնքում, որ մինչեւ ժամը 4-ը երկրորդ ընթերցումով ընդունենք, բայց այդ ընթացքում պարոն Բաբլոյեանին զանգեց պարոն Փաշինեանը եւ խնդրեց յետաձգել երկրորդ ընթերցումով քննարկումը, մինչեւ ինքը գայ, եւ բանակցութիւններ կը կայանան: Դրա համար էլ պարոն Բաբլոյեանն ասաց, որ պէտք է յետաձգենք մինչեւ յաջորդ առաւօտեան ժամը 10:00-ը: Բայց բանակցութիւնները չկայացան այնպէս, ինչպէս պէտք էր լինէր: Դա բանակցութիւն չէր, դա Ազգային ժողովին ինչ-որ բան թելադրելու փորձ էր:
«Ժ.».- Այդ օրինագծի ընդունումը իրօք այդքան օրհասակա՞ն էր, որ այդպէս վարուեցիք:
Ա. Կ.- Այդ օրինագիծը սովորական մի բան էր: Չեմ հասկանում` ինչ բուռն քննարկման թեմա կար այդտեղ: Ընդամէնը խօսւում է այն մասին, որ եթէ Աժ-ն, իրենից անկախ, չի կարողանում նիստ գումարել, ապա դա պէտք է ընդհատել եւ շարունակել յաջորդ օրը:
«Ժ.».- Մինչեւ վարչապետ Փաշինեանի` նախարարներին ազատելու հետ կապուած յայտարարութիւնը ՀՅԴ-ն յետ կանչեց իր նախարարներին: Այդ պարագայում ուրիշ տարբերակներ չէ՞ր տեսնում:
Ա. Կ.- Այո, մինչեւ դա մենք արդէն յետ էինք կանչել: Ըստ երեւոյթին, այդ ժամանակ արդէն մէկը տեղեակ էր պահել վարչապետին այդ մասին եւ գնաց էնտեղ, շատ արագ կողմնորոշուեց եւ յայտարարեց, որ ինքը հրաման է տուել ազատելու: Մենք ուրիշ տարբերակ չտեսանք, որովհետեւ ազգային համաձայնութեան կառավարութեան մի մաս ենք կազմել, մենք պայմանաւորուածութիւն ենք ունեցել, ի վերջոյ ընդունել ենք կառավարութեան ծրագիրը, որի մէջ յստակ կէտեր կան: Պարոն Փաշինեանը եկաւ եւ խաչ քաշեց այդ ամէնի վրայ: Ինքը առաջինը խախտեց պայմանաւորուածութիւնը: Մենք դեռ չունենք նոր ընտրական օրէնսգիրք, մենք ունէինք պայմանաւորուածութիւն այն մասին, որ այդ սուփերվարչապետական մեքանիզմները թուլացուեն, եւ շատ այլ հարցերի շուրջ եւս եղել են որոշումներ, որոնց հետ վարչապետը համաձայն է եղել: Այսքանից յետոյ արդէն անիմաստ էր այդ կառավարութեան մաս կազմելը:
«Ժ.».- Մինչեւ Սերժ Սարգսեանի` վարչապետ ընտրուելը ՀՅԴ խմբակցութեան ղեկավար Արմէն Ռուստամեանը յայտարարեց, որ Սերժ Սարգսեանին տրուելիք լիազօրութիւններում սուփերվարչապետութիւն չի տեսնում, իսկ հիմա պնդում է հակառակը, որ սահմանադրութեամբ սուփերվարչապետական համակարգ է: Ինչպէ՞ս կը մեկնաբանէք սա:
Ա. Կ.- Դուք մի՛ գնացէք անցեալ: Մի քանի ամիս առաջ յստակ պայմանաւորուածութիւններ են եղել հէնց նոր նշածս հարցերի մասին, եւ չի կարելի խախտել այս պայմանաւորուածութիւնները: Սիրուն չի գնալ, հասնել անցեալ, եթէ մենք նրա հետ վերջերս պայմանաւորուածութիւններ ենք ունեցել: Նա խաչ քաշեց դրա վրայ եւ ասաց` ես այսպէս եմ ուզում, եւ վե՛րջ:
«Ժ.».- Հիմա տեսնու՞մ էք բանակցութիւնների միջոցով հարցը լուծելու տարբերակը:
Ա. Կ.- Այո՛, միայն այդ տարբերակն եմ տեսնում: Եթէ մեզ համար Ազրպէյճանի հետ բանակցութիւնների տարբերակն է ընդունելի, ուրեմն մենք մեր երկրում ուրի՞շ ճանապարհ պէտք է ընտրենք: Չի կարելի մեր երկիրը փորձութեան տանել:
«Ժ.».- Եթէ այնուամենայնիւ այնպէս ստացուի, որ խորհրդարանական արտահերթ ընտրութիւնները տեղի ունենան դեկտեմբերին, «Դաշնակցութիւնը» պատրաստ կը լինի՞ դրան:
Ա. Կ.- Նախ ասեմ, որ եթէ վարչապետը հրաժարական տայ, մենք թեկնածու չենք առաջադրելու: Ինձ համար հարց է, թէ ինչո՛ւ են այդպէս ափալ-թափալ ուզում անել: Էդ ինչո՞ւ են կասկածում, որ եթէ մարտին կամ ապրիլին նոյն ձայները չեն հաւաքի, ինչ հիմա: Վարչապետը հիմնաւորում էր ներդրումների հոսքի հետ կապուած խնդրով, նրա խորհրդականն ասաց, որ դրանք իրար հետ բոլորովին կապ չունեն: Կարող ենք ենթադրել, որ նախապատրաստւում են քննարկման բերել այնպիսի օրէնքներ, որոնք պէտք է մինչեւ դեկտեմբեր ընդունուէին, բայց այս Աժ-ն դա չի ընդունի: Առայժմ չի եղել, որ Աժ-ն խանգարի որեւէ նախագծի:
«Ժ.».- Յետագայ համագործակցութեան եզրեր տեսնու՞մ էք ներկայիս կառավարութեան հետ:
Ա. Կ.- «Դաշնակցութիւնը երբեք չի մերժել բանակցութիւնների ուղով գնալու ճանապարհը: Այո՛, ի հարկէ տեսնում ենք: Յոյս ունեմ` Նիկոլ Փաշինեանի եւ իր խմբի նպատակը մեր երկիրը առաջ տանելն է, եւ մեր նպատակը նոյնպէս դա է: