ԱԲՕ ՊՈՂԻԿԵԱՆ
Համաժողովրդային ընդվզումներու, բողոքի ու ապստամբութեան տարերային դրսեւորումներու ամիս է փետրուարը:
Փետրուարին է, որ կը տօնենք յանուն խղճի ու հաւատքի ազատութեան` Վարդանանց խոյանքը, անհաւասար մարտի նետուելու եւ մարտիրոսութեան գնով թշնամիին առջեւ ծունկի չգալու վճռակամութիւնը:
Փետրուար 18-ին կը փառաւորենք մեր նորագոյն շրջանի պատմութենէն փրցուած` բռնութեան ու անարդարութեան դէմ պոռթկումն ու ընդվզումը, պոլշեւիկեան ապազգային վարքագիծին դէմ ծառացումը:
Փետրուարը նաեւ ազդարարեց պատմական շրջադարձը, ամէնէն անհաւանական, ամէնէն անհաւատալի երազներուն ի խնդիր համազգային խիզախութեան յաղթական երթի սկիզբը` խորհրդային բռնատիրական վարչակարգին դէմ արցախեան պահանջատիրական շարժումով սկսած ու հող ազատագրելու, ազգային ինքնորոշման իրաւունք ամրագրելու ձեռքբերումով աւարտած:
Փետրուարեան այս պատմակշիռ իրադարձութիւնները մեզի կը յուշեն, որ մեր ժողովուրդը իր մէջ մշտապէս պահած ունի անարդարութիւնը մերժելու եւ իր իրաւունքներու ոտնահարումին դէմ պայքարելու ներուժ, որ կրնայ որեւէ պահու ժայթքիլ` համաժողովրդական տարերային իր բողոքը արտայայտելով տարաբնոյթ պոռթկումներով:
Սակայն անկախ պետականութիւն ունինք այսօր, ու աւելի զուսպ, շրջահայեաց ըլլալու գիտակից պարտաւորութիւնը կը թելադրէ մեր կեցուածքներն ու դիրքորոշումները: Վերջապէս, կ՛ապրինք շրջապատուած թշնամական ուժերով, որոնք ոչ մէկ պատեհութիւն պիտի փախցնեն մահացուօրէն խոցելու մեզ, խլելու մեր հողն ու երկիրը: Այո՛, մեր պետականութեան վերականգնումի քառորդ դարեայ պատմութեան ամէնէն մեծ իրագործումներէն մէկը կարելի է նկատել մեր հաւաքական վճռակամութիւնը, թէ` ամէն գնով պէտք է պահպանենք մեր ներքին կայունութիւնը, թէ` ոչ մէկ արժէք կրնայ գերազանցել անկախ պետականութեան պահպանման հրամայականը:
Անկախ պետականութեան պայմաններուն տակ, նաեւ, իրաւունք ունինք ակնկալելու, որ մեր իշխանութեան գլուխ կանգնած ուժերը, կուսակցութիւններն ու գործիչները պէտք է անդրադառնան իրենց պարտաւորութիւններուն եւ անշահախնդրօրէն ծառայեն ժողովուրդին, պաշտպանեն անոր իրաւունքները եւ աշխատին ազգային առողջ միջավայր ու մթնոլորտ ստեղծելու առաջադրանքով, փետրուարեան ընդվզումները, ցասումն ու կիրքը ստեղծարարօրէն նշանաւորելով: