Հռիփսիմեանց բարձրագոյն վարժարանի տնօրէնութիւնը, համախորհուրդ` ծնողական վարչութեան, երկուշաբթի, 8 փետրուար 2016-ին կազմակերպեց հարցազրոյցի երեկոյ մը` «Աշակերտը այսօր» խորագրով:
Հարցազրոյցի երեկոյին ընդառաջելով` ներկայ էին` ծնողներու հոծ բազմութիւն մը, ուսուցիչներ եւ վեցերորդէն մինչեւ աւարտական դասարաններու աշակերտները:
Նախաձեռնութիւնը լաւագոյն ձեւով յաջողցնելու համար ցուցադրուեցաւ «Վերջին խօսք» տեսերիզը` արաբերէն լեզուով, այս առիթով հրաւիրուած էր նաեւ ժապաւէնի բեմադրիչ Եուլիոս Հաշեմը:
Ձեռնարկի սկիզբը տեղի ունեցաւ բեմադրիչի ծանօթացում, որ իր կարգին ընդհանուր գիծերու մէջ ներկայացուց ժապաւէնի պատրաստութեան շարժառիթը, ապա ներկաները դիտեցին շուրջ մէկ ժամ տեւողութեամբ տեսերիզը, որ կը ներկայացնէր աշակերտներու դպրոցական առօրեայէն:
Տեսերիզի հիմնական առանցքը կը կազմէր դպրոց, ծնողք եւ աշակերտ եռեակի փոխյարաբերութիւններու եղանակը` շեշտելով իւրաքանչիւրի դերն ու պարտաւորութիւնները ի խնդիր նորահաս սերունդներու առողջ դաստիարակութեան:
Ժապաւէնի ցուցադրութեան աւարտին տեղի ունեցաւ քննարկում, ուր ծնողներ, ուսուցիչներ եւ աշակերտներ արտայայտուեցան ժապաւէնի դրական եւ բացասական կեցուածքներու մասին, ապա բեմադրիչը իր կարգին համադրելով արտայայտուած կարծիքներն ու ժապաւէնին նպատակները` ընդգծեց ծնողներու եւ ուսուցիչներու մանկավարժական մօտեցումներուն կարեւորութիւնը, իսկ խօսքը աշակերտներուն ուղղելով` շեշտեց` ուսման կարեւորութիւնը ներկայ դարուն արագընթաց պահանջներուն դիմաց եւ ինքնավստահ ու սեփական ուժերով առաջնորդուելու հրամայականի վրայ: