Թրքալեզու Mezopotamyaajansi.com քրտական լրատուական գործակալութիւնը անդրադարձած է Աֆրինի մէջ մնացած վերջին հայուն` Յարութ Գէորգի պատմութեան, որ նաև Հայոց ցեղասպանութենէն մազապուրծ հայերու հետնորդներէն է: Այդ մասին կը հաղորդէ «Ակունք»-ը:
Աղբիւրին համաձայն, արդէն 19 օր է, որ կը շարունակուի Աֆրինի գործողութիւնը: Այստեղ մնացած միակ հայը` Յարութ Գէորգը, այս գործողութեան պատճառով վերստին կը յիշէ Մեծ եղեռնը: 61 տարեկան Յարութ Գէորգին ընտանիքը Ցեղասպանութենէն ետք տեղափոխուած է նախ Ազեզ, ապա` Հալէպ: 50 տարի առաջ Աֆրին փոխադրուած Գէորգը մասնագիտութեամբ դարբին է: Ան 4 զաւակ ունի:
Յարութ Գէորգը գործակալութեան թղթակիցին հետ զրոյցի ընթացքին մասնաւորապէս ըսած է. «Ես Այնթապի հայերէն եմ: 1915 թուականին այնտեղէն աքսորուած ենք: Ցեղասպանութեան ժամանակ եկանք Հալէպ, աւելի ուշ տեղափոխուեցանք Աֆրին: Ինծի հետ բազմաթիւ հայ ընտանիքներ կային: Անոնց մեծ մասը զոհուեցաւ, մէկ մասն ալ պատերազմի պատճառով արտագաղթեց: Աֆրինի մէջ միայն ես մնացած եմ: Այստեղ բնակող միւս բոլոր ժողովուրդներու հետ միասին տէր կը կանգնինք մեր քաղաքին: Թուրքիան 100 տարիէ կը շարունակէ իր յարձակումները: Ինչպէս որ այն ժամանակ կիներն ու երեխաները կը սպաննէր, հիմա ալ է նոյն բանը կ՛ընէ: Ցեղասպանութիւնը դար մը յետոյ վերստին գտաւ մեզ»:
Գէորգը Թուրքիայէն պահանջելով վերջ տալ այդ յարձակումներուն` նաեւ ընդգծած է, որ Աֆրինը միակ քաղաքն էր, որ պատերազմ չէր տեսած, եւ աւելցուցած է. «Այլեւս բա՛ւ է: Արիւն մի՛ հեղէք: Մարդոց վրայ մի՛ յարձակիք: Աֆրինը Սուրիոյ մէջ պատերազմ չտեսած միակ վայրն էր: Ինչո՞ւ կը ձգտիք աւերել մարդոց ապաստարանը դարձած այս քաղաքը»:
Հարցազրոյցի աւարտին Գէորգը նաեւ քանի մը խօսք ըսած է իր մայրենիով` հայերէնով, ապա` նշած. «Մենք մեր հայրենի տունէն-տեղէն աքսորուեցանք, եկանք այստեղ: Հիմա կը ջանան մեզ այստեղէն ալ հանել: Մենք կը պահանջենք, որ այս պատերազմն ու յարձակումները դադրին: Թող բոլորը անսան մեր ձայնին: Մեր կոչը ուղղուած է աշխարհի բոլոր ժողովուրդներուն»: