Թուրքիոյ նախագահը միայն օրեր առաջ բացատրելով «Ձիթենիի ճիւղ» զինուորական ներխուժման նպատակը` կը յայտարարէր. «Մընպեժը պիտի ձերբազատենք ահաբեկիչներէն… որովհետեւ անոնք անոր իսկական տէրերը չեն, այլ անոր իսկական տէրերը մեր արաբ եղբայրներն են: Մեր գործողութիւնները պիտի շարունակենք հասնելով մինչեւ իրաքեան սահման` վնասազերծելու համար բոլոր ահաբեկիչները»:
Միայն օրեր ետք` երէկ, Թուրքիոյ կառավարութիւնը կը հաղորդէր, որ «Ձիթենիի ճիւղ» գործողութիւնը սահմանափակ է, եւ անոր թիրախը Աֆրինի շրջանին մէջ գտնուող ահաբեկիչներն են:
Անգարայի կողմէ իբրեւ թէ Սուրիան ահաբեկչազերծելու քաղաքականութեամբ արդարացուող ներխուժումը էութիւն եւ ուղղութիւն սկսած է փոխել երեւութապէս: Իսլամական ժիհատի, ահաբեկչազերծման, քրտական գործօնի չէզոքացման դրօշներուն ներքեւ մղուող պատերազմը մղելով` Անգարան ըստ էութեան իր հին յանկերգն է, որ կը փորձէ իրականութեան վերածել: Անվտանգութեան գօտիներու ստեղծման Անգարայի ծրագիրը, որ միշտ կը մերժուէր միջազգային համաժողովներուն, հիմա գետնի վրայ առարկայացման փուլեր կ՛արձանագրէ:
Անվտանգութեան գօտիի սահմանագծումը դիւրին չ՛ընթանար: Որքան ալ համաձայնեցուած եւ թոյլատրուած ներխուժում ըլլայ դէպի Աֆրին թրքական զօրքերու տեղաշարժը, այնուամենայնիւ որոշ գօտիներու մէջ մէկ քայլ առջեւ երկու քայլ ետեւ տեղապտոյտները տեսանելի կը դառնան:
Երբ այդ սահմանափակման մասին ակնարկութիւն կը կատարէ պաշտօնական Անգարան, խորքին մէջ անիկա թրքական ուժերուն պարտադրուած սահմանափակում մըն է: Քրտական զինեալ խմբաւորումները այնքան մը պիտի չչէզոքացուին, որ Անգարան կարենայ իր առաջադրած գօտիները իր վերահսկողութեան տակ առնել: Միաժամանակ սակայն, Սուրիոյ տարածքին քիւրտերու աշխարհագրական միաւորումը տեղի պիտի չունենայ, որպէսզի իրողապէս ինքնավար իրավիճակը կայացման միտումներ չպարզէ:
Ուժերու հաւասարակշռումի այս խաղի կանոնները որոշ առումով կը թելադրէ գլխաւոր խաղացող Ռուսիան, որ ահաւասիկ ստանձնած է միջնորդութիւնը քրտական ուժեր-Դամասկոս բանակցութիւններու գործընթացին:
Այդ բանակցութիւնները կը նպատակադրեն Աֆրինի վերահսկողութիւնը յանձնել պաշտօնական Դամասկոսին:
Եթէ ատիկա իրականանայ, ինչպէ՞ս կը մեկնաբանուի մինչ այդ պատահածը: Անգարան կանաչ լոյս կը ստանայ Մոսկուայէն սկսելու ներխուժման գործողութիւնը: Համեմատաբար արագ ներխուժման կը յաջորդեն լուրջ դիմադրութիւններ: Կը վերագրաւուին դիրքեր, որոնք քիւրտերը կորսնցուցած էին: Քիւրտ-թուրք պատերազմը որոշ տեղեր կը կերպարանափոխուի եւ կը վերածուի կառավարական եւ անոնց յենած ժողովրդային ուժերու եւ սուրիական ընդդիմադիր ուժերու միջեւ ընդհարումներու: Կտրուկ կշռոյթներով կը գրաւուին, կը կորսնցուին եւ կը վերագրաւուին կարեւոր դիրքեր:
Այս բոլորին զուգահեռ միայն օրերու տարբերութեամբ թրքական յոխորտանքները մինչեւ իրաքեան սահման ներխուժումը ծաւալելու կը վերածուին սահմանափակուելու որոշումներու: Մինչ, քաղաքական բանակցային գործընթացը թէ՛ Աֆրինի ճակատագիրը ճշդելու տեղական առումով եւ թէ՛ Սոչիի բանակցութիւնները դարձեալ գլխաւոր միջնորդի նախաձեռնութեամբ` Սուրիոյ տագնապի հանգուցալուծման ուղիներ ճշդելու, տեղի կ՛ունենան միեւնոյն օրերուն:
«Ա.»