Հայաստանի տարածքին օրկանական գիւղատնտեսութեամբ կը զբաղին 86 արտադրողներ:
Հայաստանի գիւղատնտեսութեան նախարարի տեղակալ Արմէն Յարութիւնեանը յայտնեց, որ արտադրողներուն թիւը կարելի եղած է կրկնապատկել Եւրոմիութեան եւ Աւստրիոյ զարգացման գործակալութեան ֆինանսաւորումով իրականացուող օրկանական գիւղատնտեսութեան զարգացման ուղղուած ծրագիրին շնորհիւ:
«Բաւականին հետաքրքրութիւն կայ հայկական օրկանական ապրանքներու նկատմամբ, բայց արտահանման կազմակերպման հիմնական հարցը կապուած է արտադրական ծաւալներու ապահովման հետ», յայտնեց փոխնախարարը` աւելցնելով, որ կենդանական ծագման օրկանական ապրանքներէն Հայաստան այսօր կ՛արտածէ մեղր եւ խեցգետին: Մեղրի արտածման աշխարհագրութիւնը լայն է` Եւրասիական միացեալ շուկայ, գլխաւորաբար` Ռուսիա, Չինաստան, Արաբական Միացեալ Էմիրութիւններ եւ Եւրոպական Միութեան երկիրներ: