ՊԵՏԻԿ
Կարդացի «Ազդակ»-ի մէջ այն անհունօրէն գնահատելի լուրը, որ ՀՅԴ Լիբանանի Կեդրոնական կոմիտէին հաստատած «Ազգային ինքնութեան ամրապնդման ֆոնտ»-ը վեց ամսուան ընթացքին ընդառաջած է եւ գոհացում տուած է 152 հայ դիմորդներու:
Մինչեւ հոկտեմբեր ամսուն հինգ հայ ընտանիքներ կազմուած են, 14 հայ մանուկներ մկրտուած ու մէկ երեխայ ծնած է միանալու իր երկու քոյր-եղբայրներուն:
Քաջալերելի այս ֆոնտին գաղափարը, անիկա մեր ազգապահպանման ճիգերուն թերեւս ամենագործնական քայլն էր, որ ծնունդ առաւ Լիբանանի մէջ դրական մասնակցութեամբ հայ նուիրատուներու, որոնք այս թիւը տեսնելով եւ մանաւանդ ծանօթ ըլլալով դիմումներու ընդունման նախապայմաններուն` կրնան միայն հոգեկան գոհունակութիւն եւ հպարտութիւն զգալ:
Իմ հրաւէրս է մեր բոլոր ազգայիններուն` անխտիր, որ թիկունք կանգնին այս այնքան անհրաժեշտ ձեռնարկին, մասնակցին «Ազգային ինքնութեան ամրապնդման ֆոնտ»-ին հզօրացման եւ բարգաւաճման` ըլլալու համար անփոխարինելի նեցուկ ազգապահպանման գործին:
«Կանք, պիտի լինենք ու դեռ շատանանք»` այս հաստատակամ հաւատքին հիմնաքար մը զետեղեց ՀՅԴ Լիբանանի Կեդրոնական կոմիտէն իր այս քայլով: Պատի՛ւ իրեն եւ հպարտութի՛ւն մեզի` վճռակամօրէն, մեր հաստատ քայլերը առնելու դէպի հայ ընտանիքի ապագան: