Պատրաստեց՝ ԿԱԼԻ ԱՒԱԳԵԱՆ
Հայաստանի մէջ 2016-ին աշխատանք ծաւալած է տարբեր չափի եւ տեսակի 551 պանդոկ: Ըստ «Արմէնփրես»-ի, վկայակոչելով Հայաստանի Հանրապետութեան Ազգային վիճակագրական ծառայութեան տուեալները, անոնցմէ 302-ը կը գտնուի Երեւանի մէջ:
2014-ին պանդոկային համակարգին մէջ գործող կեդրոններու թիւը կը կազմէր 409, իսկ 2015-ին` 474: 2014-ի համեմատութեամբ, անոնց թիւը աւելցած է 142-ով, իսկ 2015-ի համեմատութեամբ` 77-ով:
Նոյն ժամանակաշրջանին աւելցած է նաեւ պանդոկներու սենեակներուն թիւը: Եթէ 2014-ին արձանագրուած է 7407 սենեակ, ապա 2015-ին անոնց թիւը հասած է 7965-ի, իսկ 2016-ին` 8523-ի:
Նշուած 8523 սենեակներ մեծ մասը` 5709-ը, սովորական սենեակներ են: Կիսաշքեղ սենեակները 2016-ին կազմած են 1764, շքեղները` 842, շքասենեակները` 208:
Ըստ սենեակներու տեսակներուն, փոփոխութիւնը նոյնպէս ուշագրաւ է` 2014-էն 2016. սովորական, շքեղ եւ շքասենեակներու թիւը աճած է, իսկ կիսաշքեղ սենեակներունը` նուազած: Սովորական սենեակներու թիւը աւելցած է կիսաշքեղներու հաշուոյն:
Պանդոկներու տնտեսութեան մէջ աշխատողներու տարեկան միջին թիւը 2016-ին եղած է 3635, 2015-ին` 3445, իսկ 2014-ին` 2927:
2016-ին պանդոկներու ոլորտի հասոյթը կազմած է 22 միլիառ 960,9 միլիոն դրամ, որմէ 18,6 միլիառը բաժին կ՛իյնայ Երեւանին: 2015-ին այդ թիւը կը կազմէր 22 միլիառ 127,2 միլիոն, իսկ 2014-ին` 18 միլիառ 937 միլիոն: