Խմբագրական «Հայրենիք»-ի. ՀՄԸՄ-ի Օրինակով

Միացեալ Նահանգներու արեւելեան շրջանի ՀՄԸՄ-ի 27-րդ Նաւասարդեան խաղերուն առիթով անգամ մը եւս բեմի վրայ է Հայ մարմնակրթական ընդհանուր միութիւնը:

Օրինակելի միութիւն մըն է ՀՄԸՄ-ը: Անսասան ու անդեդեւ` տորմիղ հրաթեւ մըն է այս միութիւնը,  տիպար ու գործօն կազմակերպութիւն մը, որ կը թակէ իր հիմնադրութեան հարիւրամեակը:

Այս առիթով, անգամ մը եւս աշխատանքի եւ գործունէութեան հրամայականը սեղանի վրայ է` իբրեւ անմիջականօրէն քննարկուելիք օրակարգ:

Շարունակ նոր գաղափարներ, իրագործումներ եւ ծրագիրներ, եւ այդ ալ` համաշխարհայնացման այս ճեպընթացային օրերուն:

Հաւանաբար ժամանակն է մտածելու վաղուան մասին:

Այսօր շատ աւելի դժուար է ՀՄԸՄ-ին համար հաւասարակշռութիւն պահելը միջավայրին մէջ պարտադրած իրականութիւններուն եւ հայեցի դաստիարակման հրամայականին միջեւ:

ՀՄԸՄ-ը որպէս պատասխանատու եւ փորձառու համահայկական կազմակերպութիւն, հետեւողական աշխատանք ունի կատարելիք` իր ամբողջական ներուժը տրամադրելով ազգային հաւաքական աշխատանքին:

Յատկապէս սփիւռքի զանազան գաղթօճախներու մէջ, ՀՄԸՄ-ը հայեցի շունչ, ոգի եւ մշակոյթ կը ջամբէ, նաեւ կը դաստիարակէ պատանի-պարմանուհի տարիքի հայորդիներ:

Ի վերջոյ, ՀՄԸՄ-ը իր ծննդոցէն կազմակերպութիւն մըն է, որ կը հաւատայ հաւաքական նպատակի եւ այդ բոլորին մէջ ալ արժէք կը տեսնէ: Այսուամենայնիւ, նաեւ` որպէս կազմակերպութիւն,  կը հաւատայ հաւաքական նպատակին եւ ազգային ռազմավարութեան:

Միութիւն մըն է ՀՄԸՄ-ը, որ միշտ ալ կը հաւատայ փոփոխութեան եւ միեւնոյն ժամանակ` բարելաւման: Եւ այս մէկը բնազդային պահանջ է, որ անբաժանելի մասնիկն է ՀՄԸՄ-ական դաստիարակութեան:

Կարգապահութիւնն ու վեհանձնութիւնը ՀՄԸՄ-ի ենթահողը կը կազմեն: Ի վերջոյ այս մեծագոյն կազմակերպութիւնը, իր օրինակելի գործունէութեամբ, կը դաստիարակէ մատղաշ սերունդը:

Պարզ ու մեկին, մարզական հանդիպումներէն եւ մրցակցութիւններէն աւելի, ՀՄԸՄ-ական մթնոլորտն է առաջնահերթութիւնը, եւ վստահաբար Փրովիտենսի մէջ կատարուելիք այս տարուան Նաւասարդեան խաղերուն այս իւրայատուկ եւ եզակի ՀՄԸՄ-ական տիպարն է, որ յաղթական դուրս պիտի գայ:

ՀՄԸՄ-ի այս խաղերուն կրկին պիտի բնորոշուի ՀՄԸՄ-ի առաքելութիւնը:

Նմանօրինակ ձեռնարկներով ՀՄԸՄ ենթահողը կը պատրաստէ ապագայ սերունդին, ապագայ տեսլականին` ապառնի ՀՄԸՄ-ին:

Միշտ ալ հպարտ է ՀՄԸՄ-ականը, եւ յատկապէս յանձնառու` իր հայ պատկանելիութեամբ:

Յուլիս 1, 2017