ԼԱԼԷ ԲԱԳՐԱՏՈՒՆԻ
Ո՞ւր ես, ո՛վ երիտասարդ: Տանդ մէջ հանգիստ նստած, բջիջայինիդ վրայ կեդրոնացած` կը ստուգես ընկերային ցանցերը ու կը հանդիպիս լուրի մը` հայրենիքէն. Ազրպէյճան խախտած է զինադադարը ու հայկական կողմը զոհ տուած է: Կը կարդաս ու կը շարունակես նկարներ դիտելու ժամանցդ:
Ո՞ւր ես, ո՛վ հայ երիտասարդ. մէկ մասդ Արցախի սահմանը կը պաշտպանէ, միւս մասդ Թուրքիոյ ծովափերուն արեւը կը վայելէ:
Ո՞ւր էիր, հուժկո՛ւ երիտասարդ, երբ թուրքը յարձակեցաւ խաղաղ ժողովուրդիդ վրայ: Թուրքը յարձակեցաւ ժողովուրդիդ վրայ` ո՛չ թէ Արեւմտեան Հայաստանի մէջ, հարիւր տարի առաջ, ո՛չ թէ Արցախի սահմանին վրայ եւ ոչ ալ Քեսապի մէջ: Թուրքը յարձակեցաւ ժողովուրդիդ վրայ` ազատ խօսքի մայրաքաղաքի՛ն մէջ, օտար երկրի հողին վրայ:
Ո՞ւր էիք, սիրելի՛ հայ երիտասարդ-երիտասարդուհիներ, երբ Թուրքիոյ նախագահին հրահանգով անմեղ ժողովուրդդ ծեծի ենթարկուեցաւ ու արիւնլուայ եղաւ: Ո՞ւր էիր, երբ թուրքը աւանակի նման կից զարնելով` գետին փռեց երէց հայորդիդ: Ո՞ւր էիր, երբ թուրքը Ամերիկայի մէջ նոյնիսկ քու ազատ խօսելու իրաւունքդ անգամ մը եւս բռնաբարեց իր բազուկներով:
Ո՞ւր ենք: Նստած մեր ընկերներուն հետ` կը քննարկենք Թրամփի մէկ ապուշաբանութիւնը եւ «ծակ փիլիսոփայական» վերլուծումներով կը մշակենք հայ ժողովուրդի քաղաքական ուղեգիծը:
Զա՛րկ, զա՛րկ թշնամիիդ: Այդ թշնամիդ, որ հարիւր տարի անց տակաւի՛ն կը յանդգնի ձեռք բարձրացնել մեր վրայ… բայց ինչո՞ւ չընէ: Ինչո՞ւ չընէ, երբ իր ցեղասպան նախահայրերը պատժողները յանիրաւի կը պիտակաւորուին իբրեւ «տեռորիստ», եւ երբ մենք ի՛ր պատճառով ստեղծուած սփիւռքին մէջ կ՛ընտրենք անոր շահերու պաշտպաններն ու դաշնակիցները` անձնական շահ ապահովելու նպատակով, եւ երբ մենք, մե՛ր իսկ ձեռքերով, մեր ժողովուրդի, ազգի եւ հայրենիքի ճակատագիրը յանձնած ենք ի՛ր իսկ բարեկամներուն, ապա ինչո՞ւ չհարուածէ մեզ:
Ինչո՞ւ պիտի չհարուածէ մեզ թուրքը, երբ մեր բեմերէն, ժողովներէն ու դասարաններէն կը լսենք յուսահատ ու պարտուողական խօսքեր` մեր Դատին վերաբերեալ:
«Ամօ՛թ է, սխա՛լ է, մենք թուրքին նման վայրագ չենք» կ՛ըսեն, բայց անգամ մը եւս մեր հայ երիտասարդը փաստեց, որ ինք թուրքին ճանչցած վախկո՛տ հայն է, որ քաղաքակրթութեան ետեւ պահուըտելով, մէկ-երկու յօդուած գրելով եւ օտարին կոչ ընելով` կը փորձէ լուծել իր Դատը:
Ո՞ւր էք, երիտասարդնե՛ր, ռազմակոչը լսեցէ՛ք… Թուրքը նո՛յն թուրքն է, իսկ հայն ալ` նո՛յն հայը: