Լոս Անճելըս գաւառի Վերահսկիչներու խորհուրդը երեքշաբթի, մարտ 28-ին միաձայնութեամբ վաւերացուց վերահսկիչներ Քեթրին Պարկըրի եւ Ճոնիս Հանի կողմէ առաջադրուած այն առաջարկը, որ ապրիլ ամիսը «Հայոց պատմութեան ամիս» կը հռչակէ գաւառին տարածքին:
Պարկըր կը յայտնէ, թէ խորհուրդը իր այս որոշումով կ՛ուզէ լուսարձակի տակ առնել հայ համայնքին ունեցած բարենպաստ ներդրումները Լոս Անճելըս գաւառի տնտեսութեան եւ մշակոյթի մարզին մէջ:
Պարկըր կ՛աւելցնէ, որ Լոս Անճելըս գաւառի Վերահսկիչներու խորհուրդը որոշած է ապրիլ ամսուան իւրաքանչիւր երեքշաբթի օրուան ընթացքին հայ քաղաքացի մը մեծարել, իսկ ապրիլ 18-ը «Յիշատակի օր» պիտի հռչակուի ոգեկոչելու համար Հայոց ցեղասպանութեան զոհերը: