Ն. ԱՒԱԳԵԱՆ
ԼՕԽ-ի Շրջանային վարչութեան քարոզչական յանձնախումբը, որուն պարտականութիւնն էր պատրաստել կազմակերպութեան օրացոյցը, խորհրդածութիւններէ ետք յարմար նկատած էր, որ 2016-ի օրացոյցին էջերուն պատկերազարդման համար դիմէ լիբանանահայ երիտասարդ արուեստագէտներու, զանոնք քաջալերելու, տաղանդներ յայտնաբերելու եւ Ցեղասպանութենէն 100-ամեակ մը ետք նոր ու երիտասարդ միտքերով ներկայանալու համար հանրութեան: Յանձնախումբին առաջարկով մեծաթիւ երիտասարդներ ընդառաջած էին գաղափարին եւ լրջութեամբ փորձած էին իրենց լաւագոյնը տալ 2016-ի օրացոյցին եւ նոթատետրին:
Երիտասարդ նկարիչներու գեղանկարներուն ուղղութեան եւ արժեւորման համար քարոզչական յանձնախումբը դիմած էր «Այբ թու զետ» եւ Համազգայինի «Թորոս Ռոսլին» ակադեմիաներուն տնօրէնութեանց, որոնք մնայուն ներկայութեամբ եւ բծախնդրութեամբ հետեւած էին աշխատանքին:
Բոլորին հետեւողական ճիգերով լոյս տեսան 2016 տարուան ԼՕԽ-ի օրացոյցն ու նոթատետրը, որոնց էջերը պատկերազարդուեցան լիբանանահայ երիտասարդ արուեստագէտներուն գծագրութիւններով:
Այդ առիթով ալ, առ ի գնահատանք եւ երախտագիտութիւն անոնց ցուցաբերած նպաստին, երեքշաբթի, 15 դեկտեմբեր 2015-ի երեկոյեան Շրջանային վարչութեան քարոզչական յանձնախումբը ԼՕԽ-ի յարկին ներքեւ հրաւիրած էր 2016 տարուան իր օրացոյցի եւ նոթատետրի էջերը պատկերազարդած լիբանանահայ երիտասարդ արուեստագէտները:
Բոլորիս ծանօթ է, որ ԼՕԽ-ի «Արաքսի Պուլղուրճեան» կեդրոնի «Թնճուկեան» սրահին մէջ սովորաբար կը գումարուին ժողովներ, կը կազմակերպուին դասախօսութիւններ, տարեցներու եւ մանուկներու յատուկ խրախճանքներ:
Այդ օր, սակայն, «Թնճուկեան» սրահին երեւոյթը տարբեր էր. նորահաս երիտասարդներու ներկայութիւնը տարբեր երանգ մը տուած է սրահին: Անոնց ներկայութիւնը ԼՕԽ-ի ԱՊԸԲ կեդրոնէն ներս լաւագոյն փաստ մըն էր այս մարդասիրական կազմակերպութեան հանդէպ իրենց ունեցած յարգանքին: Անոնք, իրենց իսկ վկայութեամբ, ճիշդ է որ ծանօթ էին ԼՕԽ-ի գործունէութեան, սակայն մեծ փափաք ունէին օրացոյցի եւ նոթատետրի պատրաստութեան իրենց գործակցութեամբ, պատկերած թեմաներուն ընդմէջէն, յաճախակի հանդիպումներու ճամբով աւելի մօտէն ծանօթանալու Լիբանանահայ օգնութեան խաչի լայնածաւալ աշխատանքներուն:
Անոնք հաստատեցին նաեւ, որ ԼՕԽ-ը իրենցմէ իւրաքանչիւրին առիթ ընծայած էր ինքնավստահ քայլերով հանրութեան ներկայանալու եւ ամրօրէն կառչելու գեղանկարչութեան արուեստին: Անոնց համար ԼՕԽ-ի օրացոյցի եւ նոթատետրի աշխատանքին մասնակցութեան հրաւէրը առիթ մըն էր նաեւ իրարու ծանօթացման եւ միասնաբար` համբերութեամբ յաջողցնելու իրենց վստահուած գործը:
Հանդիպման ընթացքին Շրջանային վարչութեան գեղարուեստի դպրոցներու ուսուցիչներուն եւ երիտասարդ գեղանկարիչներուն միջեւ փոխադարձ վստահութիւնն ու յարգանքը տպաւորիչ էին: Այդ օր «Թնճուկեան» սրահին մթնոլորտը տարբեր էր:
85-ամեայ հարուստ գործունէութեամբ Լիբանանահայ օգնութեան խաչը, 2016 տարուան իր օրացոյցին ճամբով, տարիներու պատմութեան իր էջերուն վրայ կու գայ աւելցնելու տարբեր էջ մը, ուր փորձառու եւ տարեց ԼՕԽ-ականը համեստօրէն կը վկայեն, թէ այս կազմակերպութեան դռները միշտ բաց են երիտասարդութեան դիմաց` նորանոր գաղափարներով թռիչք տալու համար իր ծրագիրներուն:
Վա՛րձքը կատար բոլորին: