Ազգային ժողովի նախագահ Գալուստ Սահակեան 22 դեկտեմբերին հանդիպում ունեցած է Ռուսիոյ Տումայի ԱՊՀ երկիրներու գործերու, եւրասիական համարկման եւ հայրենակիցներու հետ կապերու կոմիտէի նախագահ Լէոնիտ Քալաշինքովի գլխաւորած պատուիրակութեան հետ:
Ըստ Ազգային ժողովի պաշտօնական կայքին, խորհրդարանի նախագահը լուսարձակի տակ առած է այն իրողութիւնը, որ հայ-ռուսական յարաբերութիւնները աւանդական բարեկամութեան դարերու հարուստ պատմութիւն ունին, եւ անոնք երկու երկիրներու միջեւ գոյութիւն ունեցող ռազմավարական փոխադարձ գործակցութեան համար կայուն հիմք կը հանդիսանան:
Գալուստ Սահակեան ցաւակցութիւն յայտնած է Թուրքիոյ մէջ Ռուսիոյ դեսպան Անտրէյ Քարլովի սպանութեան առնչութեամբ: «Մենք կը դատապարտենք այդ հրէշային ահաբեկչական գործողութիւնը եւ կը սկսինք ռուս ժողովուրդին վիշտը», ըսած է խորհրդարանի ղեկավարը:
Երկու երկիրներու միջպետական յարաբերութիւններու շարունակական զարգացման ծիրին մէջ Ազգային ժողովի նախագահը բարձր գնահատած է օրէնսդիր մարմիններու դերը:
Հայաստանի եւ Ռուսիոյ դաշնակցային ու ռազմավարական յարաբերութիւններու ծիրին մէջ Սահակեան կարեւոր նկատած է միջազգային խորհրդարանական կառոյցներուն մէջ համագործակցութիւնը եւ փոխադարձ շահաւէտ մօտեցումներով հանդէս գալը:
Լէոնիտ Քալաշինքով բարձր գնահատած է Հայաստանի եւ Ռուսիոյ միջեւ գոյութիւն ունեցող բարեկամութիւնն ու միջխորհրդարանական համագործակցութիւնը, որոնք խարսխուած են բարեկամութեան կայուն հիմերու վրայ:
Զրուցակիցները յոյս յայտնած են, որ երեւանեան նիստին ընթացքին արտայայտուած կարծիքներն ու առաջարկները պիտի նպաստեն երկու պետութիւններու խորհրդարաններու հետագայ միացեալ աշխատանքներու արդիւնաւէտութեան բարձրացման: Քննարկուած են նաեւ փոխադարձ հետաքրքրութիւն ներկայացնող այլ հարցեր եւս: