Լեռնային Ղարաբաղի Ազգային ժողովը 22 դեկտեմբերի իր նիստին խորհրդարանին ներկայացուց «Լեռնային Ղարաբաղի 2017-ի պետական պիւտճէի մասին» օրէնքը, որ քուէարկութեամբ վաւերացուեցաւ: Այս առիթով Լեռնային Ղարաբաղի Ազգային ժողովի «Դաշնակցութիւն» խմբակցութիւնը հրապարակած էր հետեւեալ յայտարարութիւնը:
«Դաշնակցութիւն» խմբակցութիւնը միշտ էլ կարեւորել է պիւտճէի ուղղուածութիւնը եւ նրա ռազմավարական ուղղութիւնները:
Նախորդ տարիներին մենք հնարաւորութիւն ենք ունեցել գործադիրի հետ միասին առաւել կենդրոնանալ պիւտճէի ռազմավարական ուղղութիւնների վրայ: Այդ քննարկումների արդիւնքում եւ երկկողմ համոզուածութեամբ որդեգրուեց անվտանգութեան պաշարների ստեղծման ու գործնական իրականացման քաղաքականութիւնը, գիւղի եւ գիւղատնտեսութեան նկատմամբ որդեգրուած նոր քաղաքականութիւնը եւ պիւտճէտային յատկացումները, ուժանիւթի համակարգում նոր ռազմավարութիւնն ու ինքնաբաւութեան հասնելը, վերամշակման ոլորտում յաջողութիւններ արձանագրելը:
2017 թ. պետական պիւտճէի նախագծի քննարկումները տարբեր ձեւաչափերով մեզ հնարաւորութիւն են տուել խորապէս ընկալելու եւ նաեւ որոշակիօրէն ազդելու, իրատեսական պիւտճէ ունենալու համար:
«Դաշնակցութիւն» խմբակցութիւնը եւ խմբակցութեան պատգամաւորներն առանձին մի շարք առաջարկութիւններ են ներկայացրել կառավարութեանը, հանդիպել գործադիր իշխանութեան ներկայացուցիչներին:
Մեր առաջարկութիւնները վերաբերում էին տարբեր ոլորտների` բնակչութեան անվտանգութեան, ռազմավարական պաշարների, քաղաքացիական պաշտպանութեան, տարածքային համաչափ զարգացման, զանազանութեամբ յատկանշուող տնտեսութեան, գիւղի եւ գիւղատնտեսութեան, ժողովրդագրական վիճակի, բնապահպանութեան, ընկերային եւ առողջապահութեան, կրթութեան եւ արտաքին ոլորտի հիմնախնդիրներին:
Գնահատելի է, որ գործադիրը ներկայ տնտեսական ու ֆինանսական սուղ պայմաններում տրամադիր է հեռանկարային նոր ծրագրեր կեանքի կոչելուն, որում տեղ է գտել նաեւ Դաշնակցութեան մի շարք առաջարկներ: Յատկապէս շեշտելի է անվտանգութեան համակարգի ուժեղացմանն ուղղուած յատկացումների միտումները:
Ինչպէս եւ նախորդ տարիներին, մտահոգիչ է կապիտալ շինարարութեան ոլորտի ծաւալների նուազ լինելը, որն իր ազդեցութիւնն է թողնում (թէկուզեւ ժամանակաւոր) աշխատատեղերի ապահովման վրայ: Գտնում ենք, որ գործադիրը յաւելեալ ջանքեր պէտք է գործադրի, օգտագործելով նաեւ արտապիւտճէային հնարաւորութիւնները, եւ որոշակիօրէն ընդլայնի կապիտալ շինարարութեան ոլորտը, դրանով ժամանակաւորապէս ապահովելով զբաղուածութեան նուազագոյն աստիճան:
Նոր աշխատատեղերի աւելացման եւ տնտեսական աշխուժութիւն մտցնելու նպատակով անհրաժեշտ է առաւել ուշադրութեան կեդրոնում պահել արտահանման հարցը:
Ինչ վերաբերում է պիւտճէի ուղղուածութեանը. Գործադիրը հաշուի առնելով իրական վիճակը, այն հերթական անգամ որակում է սոցիալական ուղղուածութեան պիւտճէ:
Ինչպէս եւ անցեալ տարի, այս անգամ եւս բարձրաձայնենք, որ մեր պայմաններում ընկերային ուղղուածութեան պիւտճէ ունենալը կարեւոր է. Իրականութիւնը եւ մեր առջեւ ծառացած մարտահրաւէրներն ուղղակի թելադրում են մեզ ունենալու պաշտպանութեան եւ անվտանգութեան բաղադրիչների ուղղուածութեան պիւտճէ: «Դաշնակցութիւ՛ն» խմբակցութիւնը յոյսով է, որ թէ տարուայ ընթացքում եւ թէ ապագայում այս մտայնութիւնը կը դառնայ գերիշխող եւ այն գործնական ընթացք կ՛ունենայ յաջորդ տարուայ պետական պիւտճէն կազմելիս:
Մէկ կարեւոր հանգամանք եւս. 2017 թ. պետական պիւտճէի նախագծի քննարկումների ժամանակ պարզ դարձաւ, որ ԼՂՀ-ի կառավարութիւնը ստիպուած էր այն յարմարեցնել 2016 թ. ապրիլեան դէպքերից յետոյ ստեղծուած իրավիճակին` ինչը բնական էր: Տարածաշրջանում տիրող քաղաքական իրավիճակը եւ աշխարհաքաղաքական զարգացումները չեն բացառում իրավիճակի սրացումներ ինչպէս քաղաքական, այնպէս էլ ռազմական ոլորտներում: Դրանից ելնելով «Դաշնակցութիւ՛ն» խմբակցութիւնը առաջարկում է գործադիրին յառաջիկայ երկու ամիսների ընթացքում մշակել եւ Ազգային ժողովին ներկայացնել ճգնաժամային պիւտճէի նախագիծ, հաւանական զարգացումները առաւելագոյնս հեզասահ յաղթահարելու համար:
Հաշուի առնելով վերոնշեալը, ինպԷս նաեւ երկրի առջեւ ծառացած մարտահրաւէրներն ու դրանց հանգուցալուծման կարեւորութիւնը` «դաշնակցութիւն» խմբակցութիւնը 2017թ. պետական պիւտճէի նախագծին քուէարկելու է կողմ:
ԼՂՀ ԱԺ «ԴԱՇՆԱԿՑՈՒԹԻՒՆ» ԽՄԲԱԿՑՈՒԹԻՒՆ
22 դեկտեմբերի, 2016թ.