Գիւմրիի Վ. Աճեմեանի անուան պետական դրամատիկական թատրոնին մէջ 22 սեպտեմբերին տեղի ունեցաւ Հայաստանի Հանրապետութեան անկախութեան վերականգնման 25-ամեակին նուիրուած հանդիսաւոր նիստ:
Հանդիսաւոր նիստին ընթացքին Հայաստանի անկախութեան 25 տարիներու ձեռքբերումներուն, կերտած արժէքներուն մասին նախ խօսեցաւ Շիրակի թեմի առաջնորդ Միքայէլ եպս. Աջապահեան` կարեւոր նկատելով այն որոշումը, որ Հայաստանի քաղաքացին տուաւ 25 տարի առաջ: «Այսօր մենք ունինք 25-ամեայ Հայաստանի Հանրապետութիւն: Հիմա ժամանակն է, որ բոլորս սթափ ապրինք եւ աշխատինք մեր հայրենիքի հզօրացման համար ե՛ւ նիւթական, ե՛ւ հոգեւոր իմաստով: Հայրենիքի անկախութիւնը այն արժէքն է, որուն առջեւ միւս բոլոր մնացեալ նեղ ու շահադիտական ցանկութիւնները պէտք է փոշիանան ու ոչնչանան, եւ բոլորս միասնական պէտք է աշխատինք մեր երկիրը հզօրացնելու համար», նշեց թեմակալ առաջնորդը:
Հայաստանի անկախ Հանրապետութեան կերտման ու զարգացման մէջ յատուկ տեղը ունի Շիրակի մարզը, որուն մասին խօսեցաւ Շիրակի մարզապետ Յովսէփ Սիմոնեան:
Ապա ան բեմ հրաւիրեց Շիրակի նախկին մարզպետ, Հայաստանի նախագահի վերահսկողական ծառայութեան ղեկավար Ֆելիքս Ցոլակեանը, որ նախագահ Սերժ Սարգիսեանի անունով Հայաստանի Հանրապետութեան անկախութեան վերականգնման 25-ամեակին առիթով պետական պարգեւներ` «Հայրենիքին մատուցած ծառայութիւններու համար» 2-րդ աստիճանի, «Մովսէս Խորենացի», «Երախտագիտութիւն» մետալներ յանձնեց իրենց աշխատանքին մէջ աչքի ինկած զանազան մարզերու ներկայացուցիչներուն:
Պատուոյ գիրեր յանձնեց նաեւ Շիրակի մարզպետը:
Հանդիսաւոր նիստը եզրափակուեցաւ տօնական համերգով: