ՊԵՏՐՈՍ ՓԻԼԱՒՃԵԱՆ
Բախտաւոր նորածին իմ սիրուն թոռնիկ` Արին-Լորի:
Շնորհաւոր ծնունդդ եւ սուրբ մկրտութիւնդ:
Այսօր մենք` ամբողջ ընտանիքով եւ անհամբեր ուրախութեամբ եւ հպարտութեամբ կը վայելենք քու ծնունդդ եւ սուրբ մկրտութիւնդ` համբուրելով քու գլուխն ու ճակատը:
Սիրո՛ւն թոռնիկս` դուն ծնար ՀԱՅ մօրմով եւ ՀԱՅ հօրմով` ԶՈՒՏ ՀԱՅ, բայց` ոչ քրիստոնեայ:
Սուրբ մկրտութեանդ ընթացքին Աստուած պապայէն խնդրեցիր` հաւատք, յոյս, սէր եւ մկրտութիւն:
Մկրտուելով` ունեցար երկու կրօն եւ կոչուեցար ՑԵՂԱԿՐՕՆ ՀԱՅ քրիստոնեայ:
Առաջին. սիրո՛ւն թոռնիկս, հայկական եկեղեցի յաճախես, միշտ աղօթես Աստուած պապային, որ քեզի պարգեւէ լուսապայծառ ապագայ:
Երկրորդ. երբ հայկական վարժարանը աւարտես եւ համալսարան երթաս, պէտք է անպայման հաւատարիմ մնաս քու ազգային պատկանելիութեանդ. գրես, կարդաս` խօսելով մաքուր հայերէն:
Երրորդ. ՀՄԸՄ-ական պապադ քեզի արենուշական շարքերուն պիտի արձանագրէ, որպէսզի հայկական շրջանակի մէջ ունենաս ՀԱՅ ընկերներ, ընկերուհիներ, քոյրեր եւ եղբայրներ:
Բաղձանք
Սիրելի՛ տղաս եւ հարսս.
Եթէ չէք ուզեր Աստուծոյ հանդէպ մեղանչել, Արինին հետ հայերէն պէտք է խօսիք տան մէջ, որովհետեւ սահուն հայերէն խօսիլը օրօրոցէն եւ տունէն կը սկսի: Տան մէջ խօսակցական լեզուն հայերէն պէտք է ըլլայ: Իր ներկայութեան դուք իրարու հետ անգլերէն երբեք պէտք չէ խօսիք:
Մաղթանք Մեծ Հօրդ Կողմէ
Սիրո՛ւն թոռնիկս Արին-Լորի,
Մեծ հօրդ միակ փափաքն ու մաղթանքն է, որ հետեւիս ՀԱՅ հօրդ եւ ՀԱՅ մօրդ օրինակին, ՑԵՂԱՃԱՆԱՉ մնաս, գտնես քու ցեղակիցը` քեզի նման ՀԱՅԸ, որպէս քու կեանքի ընկերդ:
Կը ներէք, այս իմ գրած մէկ էջը անձնական գովաբանութիւն մի՛ համարէք, այս էջը ազգային ցեղաճանաչ մնալու թելադրանքներ են իմ թոռնիկիս եւ նոր սերունդին:
Թորոնթօ