Վենետիկի 73-րդ շարժապատկերի փառատօնի երեք միջազգային դատակազմերը արդէն ձեւաւորուած են: Ըստ «Կինօաշխարհ»-ի, հիմնական մրցոյթի դատակազմը պիտի գլխաւորէ բրիտանացի բեմադրիչ Սեմ Մենտես, որ առաջին ժապաւէնին համար «Օսքար»-ի արժանացած աշխարհի վեց բեմադրիչներէն մէկն է:
Փառատօնի «Հորիզոններ» բաժինի դատակազմի նախագահն է ֆրանսահայ բեմադրիչ Ռոպեր Կետիկեան, որ անցեալ տարի «Ոսկէ ծիրան» փառատօնի հիմնական մրցոյթի դատակազմի նախագահն էր եւ անոր «Խենթի պատմութիւն» ժապաւէնով բացուեցաւ փառատօնը:
Նշենք, որ «Հորիզոններ» բաժինին մէջ կը ներկայացուին այն ժապաւէններով, որոնք նոր միտումներ կը բերեն համաշխարհային շարժապատկերի արուեստին մէջ:
«Հորիզոններ» բաժինի դատակազմին մաս կը կազմեն` ամերիկացի քննադատ եւ շարժապատկերի արուեստի պատմաբան, շարժապատկերի մասին 13 գիրքերու հեղինակ ճիմ Հապըրման, եգիպտացի դերասանուհի, Գահիրէի եւ Արաբական շարժապատկերի փառատօներու մրցանակակիր Նելլի Քարիմ, իտալացի նշանաւոր դերասանուհի Վալենթինա Լոտովինի, քորէացի դերասանուհի եւ բեմադրիչ Մուն Սոյ-Ռի եւ հնդիկ բեմադրիչ Ճայթանիա Թամհանէ:
Վենետիկի «Առաջին շարժապատկեր»-ին համար «Լուիճի տէ Լորենթիսի» մրցանակի` «Ապագայի առիւծ»-ի դատակազմի նախագահն է իտալացի դերասան, «Տաւիտ տի Տոնաթելլօ» մրցանակը շահած Քիմ Ռոսի Սթիուըրթ:
Վենետիկի 73-րդ շարժապատկերի փառատօնը պիտի կայանայ 31 օգոստոսէն 10 սեպտեմբեր: