Յ. ԼԱՏՈՅԵԱՆ
2014 սեպտեմբերին թրքական «Հիւրրիէթ» թերթի խմբագիրներէն Պուրաք Պեքթիլը իր մէկ յօդուածին մէջ ակնարկելով ՏԱՀԵՇ-ի ստեղծման եւ զարգացման մասին` կ՛ըսէր, որ Թուրքիոյ կողմէ ստեղծուած այս շարժումը «Ֆրանքշթանեան հրէշ» է, որ ոչ միայն դէպի Սուրիա թափանցելու մէջ ազատութիւն ունի, այլ նաեւ ամբողջ Թուրքիոյ տարածքին ազատ եւ անկաշկանդ գործունէութիւն ծաւալած է: Յօդուածագիրը կը պնդէ, որ պաշտօնական Անգարան կազմակերպութեան ստեղծման մէջ պատասխանատու է:
Փաստօրէն այսօր նոյն այս հովանաւորուած կազմակերպութիւնը Թուրքիոյ համար վտանգ դարձած է: Նախ` Եւրոպայի երրորդ ամէնէն մեծ օդակայանի պայթումին պատճառով, երկրորդ` անցեալ տարուան ընթացքին ՏԱՀԵՇ-ի կողմէ շարունակական պայթումները խլեցին աւելի քան 200 զոհ:
Անկախ զբօսաշրջութեան թափին ազդելէն, ներքին քաղաքական եւ տնտեսական լուրջ հանգրուանի մը առջեւ կը գտնուի այսօր միանձնեայ կառավարուող թրքական պետութիւնը:
Ճիշդ այդ պատճառով մէկ շաբթուան մէջ Թուրքիոյ նախագահը, որպէսզի իր ժողովրդականութիւնը չկորսնցնէ, Իսրայէլի եւ Ռուսիոյ հետ իր յարաբերութիւնը վերանայելու համար եւ այս մտահոգութեամբ ձեռք երկարեց նոր էջ մը բանալու համար:
Սակայն խորքային ոչ մէկ բան փոխուած է:
Տակաւին Թուրքիոյ սահմանները բաց են ՏԱՀԵՇ-ի եւ անոր մեղսակիցներուն համար, որպէսզի ազատ շրջագային:
Տակաւին Պոլսոյ զբօսաշրջիկներու շուկային մէջ ազատօրէն կը վաճառուին ՏԱՀԵՇ-ի յուշանուէրներ:
Տակաւին քիւրտերու հետ անոր ահաբեկչական արարքները նոյն թափը ունին:
Եւ վերջապէս, Թուրքիոյ` Եւրոմիութիւն մտնելու երազներն ալ կը մնան երեւակայական սահմաններու մէջ` նկատի ունենալով անոր վարած ներքին եւ արտաքին քաղաքականութիւնը:
Թուրքիոյ արտաքին քաղաքականութեան վերանայումը անպայմանօրէն մեծ դեր պիտի ունենայ յառաջիկայ ամիսներու ռազմական եւ դիւանագիտական կապերուն վրայ:
Թուրքիոյ միանձնեայ պետութիւնը պահ մը ինքզինք գտած է անել կացութեան մը առջեւ:
Ժամանակը ի վնաս այսօրուան իշխող ղեկավարութեան է: Քաղաքական, տնտեսական, ապահովական եւ կրօնական ծանր ճգնաժամի առջեւ կը գտնուի:
Յառաջիկայ ամիսները նոր մարտավարական իրավիճակի մը առջեւ պիտի գտնուի: