Աւելի քան երեք հարիւր ութսուն հրատարակչատուներ` քսան տարբեր երկիրներէ ժամանած, մաս կազմեցին Պահրէյնի թագաւորութեան 17-րդ Միջազգային գիրքի ցուցահանդէսին: Ցուցահանդէսը տեղի ունեցաւ մարտ 24-3 ապրիլ 2016, Պահրէյնի Ազգային թանգարանի մեծ ցուցահանդէսի սրահին մէջ, կազմակերպութեամբ մշակոյթի նախարարութեան:
Աստուածաշունչի ընկերակցութիւնը, պաշտօնական հրաւէրով Պահրէյնի մշակոյթի նախարարութեան, մաս կազմեց այս միջազգային ցուցահանդէսին: Աստուածաշունչի ընկերակցութիւնը առաջին անգամն էր, որ կը մասնակցէր այս ցուցահանդէսին` ըլլալով միակ քրիստոնէական կազմակերպութիւնը: Աստուածաշունչի ընկերակցութիւնը ցուցադրութեան դրած էր տարբեր լեզուներով աւելի քան երկու հարիւր Աստուածաշունչեր, նաեւ փոքր ցուցահանդէս մը ներկայացնելով` Աստուածաշունչը պատմութեան առանցքին, վեր առնելով անոր մշակութային յատկութիւնները եւ տարբեր թարգմանութիւնները: Անոր մասնակցութիւնը ստեղծեց մեծ հետաքրքրութիւն, տեղական մամուլը անդրադարձաւ այս երեւոյթին: Մեծ էր թիւը այցելուներուն, որոնց հետաքրքրութիւնը եւ հարցումները կը կեդրոնանային Աստուածաշունչի բովանդակութեան եւ անոր աստուածաբանական տուեալներուն վրայ: Հետաքրքրական էր տեղացի չափահաս կնոջ մը ակնարկութիւնը: Երբ նայեցաւ Աստուածաշունչերուն եւ անոր կողքին, այլ հրատարակչատան մը տաղաւարին վրայ ցուցադրութեան դրուած Ղուրաններուն, ըսաւ. «Այս մեծ վկայութիւն մըն է Պահրէյնի եւ բոլոր այցելուներուն համար, որոնք կրնան տեսնել, թէ կարելի է միասին ապրիլ»:
Դոկտ. Հրայր Ճէպէճեան` Ընդհանուր քարտուղարը Աստուածաշունչի ընկերակցութեան, ունեցաւ յատուկ հարցազրոյց մը Պահրէյնի հեռատեսիլէն: Ան խօսեցաւ Աստուածաշունչի ընկերակցութեան մասին, ինչպէս նաեւ` Աստուածաշունչ մատեանին: «Աստուածաշունչը միայն քրիստոնէական կրօնին գիրքը չէ: Անիկա նաեւ մշակութային գիրք է, որ համակեցութիւն կը քաջալերէ տարբեր կրօններու եւ ժողովուրդներու միջեւ», ըսաւ ան եւ շնորհակալութիւն յայտնեց Պահրէյնի պետութեան, որ կը քաջալերէ միջկրօնական գոյակեցութիւնը եւ հասկացողութիւնը: «Պահրէյնի թագաւորութիւնը այն երկիրն է, ուր տարբեր ժողովուրդներ, մշակոյթներ եւ կրօններ միասին կ՛ապրին համերաշխօրէն: Ներկայ օրերուն մենք պէտք ունինք այս տեսակի օրինակելի համակեցութիւններու», յայտնեց ան: