Ղարաբաղի հակամարտութեան գօտիին մէջ ռազմական գործողութիւններու աշխուժացումը հետեւանքն է Թուրքիոյ եւ Ազրպէյճանի միջեւ տեղի ունեցած պայմանաւորուածութեան, որուն նպատակն է Ռուսիան ներքաշել այլ զինուած հակամարտութեան մը մէջ: Այս մասին կը հաղորդէ չեխական պարբերականի «Czech Free Press» յօդուածագիր Լատիսլավ Քաշուքան:
Անոր կարծիքով, շատ դիւրին է նկատել Թուրքիոյ մասնակցութիւնը Լեռնային Ղարաբաղի մէջ տեղի ունեցած դէպքերուն: Առաջին, անցեալ տարուան նոյեմբերին ռուսական օդանաւի մը խոցումը կը պարզէ Թուրքիոյ աջակցութիւնը սուրիական ահաբեկչական խմբաւորումներուն եւ, ըստ Pravda.ru-ի, Թուրքիա գաղտնի առեւտրական յարաբերութիւններ ունի իսլամական պետութեան հետ:
Յիշեցնենք, որ Թուրքիոյ եւ Ռուսիոյ յարաբերութիւնները վատթարացած են թուրք-սուրիական սահմանին ռուսական «Սու-24» ինքնաթիռին խոցումէն ետք: Ռուսիա պատժամիջոցներ սահմանած է Թուրքիոյ նկատմամբ` արգիլելով այդ երկրէն շարք մը սննդամթերքներու, թռչնամիսի եւ միրգերու ներածումը, ինչպէս նաեւ սահմանափակած է ռուս զբօսաշրջիկներու` Թուրքիոյ հանգստավայրերը այցելելու կարելիութիւնը:
Երկրորդ, այս դէպքերէն ետք շարք մը հանդիպումներ տեղի ունեցած են Թուրքիոյ եւ Ազրպէյճանի բարձրաստիճան ներկայացուցիչներու միջեւ:
Եւ երրորդ, «բաւական կարճ ժամանակ ետք Ազրպէյճան կը յարձակի Լեռնային Ղարաբաղի վրայ», կը գրէ պարբերականը:
Յօդուածագիրը կը նշէ, որ Ղարաբաղի հակամարտութեան կողմերը զինադադարի խախտման վերաբերեալ առաջին մեղադրանքները փոխանակելու չհասած, արդէն Թուրքիոյ Նախագահ Ռեճեպ Թայիփ Էրտողան կը յայտարարէ, որ իր պետութիւնը «ամբողջութեամբ Ազրպէյճանի կողքին է»:
Հեղինակը կը նշէ, որ յստակ է, թէ այս մէկը Հայաստանի վաղեմի բարեկամը` Ռուսիան, այլ զինեալ հակամարտութեան մը ներքաշելու փորձ է: