Հայաստանեայց առաքելական եկեղեցւոյ Քանատահայոց թեմի առաջնորդարանը իր անհանգստութիւնը կը յայտնէ ու խստօրէն կը դատապարտէ Ազրպէյճանի աննախադէպ դաժան յարձակումները Լեռնային Ղարաբաղի վրայ, որ սկիզբ առին ապրիլ 2-ին, եւ կոչ կ՛ուղղէ Քանատայի կառավարութեան եւ միջազգային կառոյցներուն` աներկբայ կերպով դատապարտելու Ազրպէյճանի կողմէ խախտումը 1994-ի զինադադարին: Այս ոտնձգութիւնը ուղղակիօրէն արդիւքն է անցեալի երկդիմի քաղաքականութեան, որ առարկայականօրէն չպարզեցին, թէ Ազրպէյճանը եղաւ նախայարձակը եւ պատասխանատուն Արցախի դէմ անցեալի բոլոր յարձակումներուն:
Արցախի դէմ Ազրպէյճանի սանձարձակ ռազմական գործողութիւններուն եւ դաժան յարձակումներուն ողբերգական լուրերը ցնցեցին մեզ եւ համայն քանատահայութիւնը: Բոլորս մօտէն կը հետեւինք խաղաղասէր քաղաքացիներուն դէմ կատարուած յարձակումներուն, ինչպէս նաեւ քաջատեղեակ ենք նախայարձակողներուն դէմ մեր եղբայրներուն եւ քոյրերուն իրագործած հերոսական եւ քաջարի հակահարուածներէն: Սակայն, նախայարձակումները պատճառեցին ծանրակշիռ վնասներ թէ՛ քաղաքացիական խաղաղ բնակչութեան, եւ թէ ռազմական շարքերուն մէջ:
Ուստի կոչ կ՛ուղղենք Քանատայի կառավարութեան եւ միջազգային մարմիններուն, որ վճռական կերպով դատապարտեն Ազրպէյճանի զինուած ուժերու սադրիչ գործողութիւնները, եւ վերջինս վերադառնայ զինադադարի պահպանման եւ խաղաղ բանակցութիւններու հոլովոյթին:
Աղօթք կը վերառաքենք Արցախի հակամարտութիւններուն իբրեւ հետեւանք զոհ դարձած մեր հայորդիներուն համար, ինչպէս նաեւ խաղաղութեան եւ ապահովութեան ի սպաս աղօթք Արցախի բնակչութեան, եւ հայ քաջարի զինուորներուն համար, որոնք կը պաշտպանեն իրենց սահմանները` ի գին իրենց կեանքերուն: