Մուրացանի ռազմական հիւանդանոցը գտնուող վիրաւոր զինուորներուն այցելած են ՀՄԸՄ-ՀԱՍԿ-ի սկաուտները, որոնք սնունդ եւ սուրճ բերած էին անոնց ծնողներուն:
Հիւանդանոցին մօտ կը գտնուէին նաեւ «Վարդանանք» հասարակական կազմակերպութեան անդամները, որոնք զօրակցութեան նոյնանման նախաձեռնութեան մը ձեռնարկած էին, եւ ՀՄԸՄ-ՀԱՍԿ-ի սկաուտները միացան անոնց:
«Սնունդ եւ ջուր բերած ենք հիւանդանոցին դիմաց իրենց վիրաւոր որդիներուն սպասող ծնողներուն` թեթեւցնելու համար անոնց առօրեայ հոգը», ըսած է ՀՄԸՄ-ՀԱՍԿ-ի անդամ Յարութիւն Դերիկլեան:
Սկաուտները նաեւ հաւաքած են գրենական պիտոյքներ եւ խաղալիքներ` Լեռնային Ղարաբաղի վնասուած գիւղերուն երեխաներուն համար:
«Երէկ սկսանք առաջին անհրաժեշտութեան իրեր հաւաքել, ինչպէս նաեւ գրենական պիտոյքներ, հագուստ եւ խաղալիքներ սահմանային գիւղերու երեխաներուն համար», ըսած է ՀՄԸՄ-ՀԱՍԿ-ի անդամ Արամ Աղաջանեան: