Հովանաւորութեամբ Սպահանի Հայոց թեմի առաջնորդ Բաբգէն արք. Չարեանի եւ կազմակերպութեամբ ՀՅԴ «Ռուբէն» երիտասարդական միութեան, երեքշաբթի, 5 ապրիլի երեկոյեան, Նոր Ջուղայի Հայ ՄՄ «Արարատ» միութեան սրահին մէջ տեղի ունեցաւ զօրակցական հաւաք նուիրուած` Լեռնային Ղարաբաղի իշխանութեան ու ժողովուրդին:
Այս առիթով Կարէն Խանլարեան ընթերցեց ՀՅԴ «Ռուբէն» երիտասարդական միութեան խօսքը, ուր անոնք դատապարտելով Ազրպէյճանի ռազմական ոտնձգութիւնները, վերահաստատեցին համայնքի երիտասարդութեան զօրակցութիւնը` Արցախի ժողովուրդին:
Ապա ներկաները դիտեցին տեսերիզ մը, որ լուսարձակի տակ առած էր վերջին օրերու ընթացքին ղարաբաղեան-ազրպէյճանական սահմանին վրայ կատարուած ռազմական գործողութիւնները, ինչպէս նաեւ տեղ գտած են հայ եւ օտար բարձրաստիճան պաշտօնատարներու կարծիքները` բախումներու շուրջ:
Շրջանի Հայ դատի յանձնախումբի ներկայացուցիչ` Աշոտ Դաւթեանը եւս դատապարտելով թշնամիին ռազմական գործողութիւնները եւ յատկապէս հայկական բնակավայրերու ու խաղաղ բնակչութիւնը իր յարձակումները թիրախը դարձնելու անբարոյ գործելակերպը, կարեւորութեամբ ընդգծեց, որ Ազրպէյճանի ռազմատենչ քաղաքականութեան պատճառով վտանգուած է Հարաւային Կովկասի ու տարածաշրջանի կայունութիւնը: Դաւիթեան աւելցուց նաեւ, որ Նոր Ջուղայի Հայ դատի յանձնախումբը` իր բոլոր կառոյցներով, աշխատող միութիւններով ու հայրենակիցներով իր ամբողջական զօրակցութիւնը կը յայտնէ Արցախի եւ Հայաստանի պետական կառոյցներուն:
Այնուհետեւ ելոյթ ունեցաւ Սպահանի հայոց թեմի առաջնորդ Բաբգէն արք. Չարեան, որ` գնահատելով հայ զինուորին ու ժողովուրդի հերոսութիւնները, դատապարտեց թշնամիին ոտնձգութիւնները: «Մենք` որպէս Քրիստոսի յարութեան հաւատացող ժողովուրդ, խաղաղութեան կողմնակից ենք, սակայն երբ սուրը բարձրանայ մեր գլխին, կը կոտրենք այդ սուրը®»: Բաբգէն արք. Չարեանը իր խօսքի աւարտին խնդրեց Իրանի պետութենէն` ինչպէս միշտ, շարունակէ իր դրական դերակատարութիւնը տարածաշրջանի խաղաղութեան հաստատման գործին մէջ:
Զօրակցական հաւաքի աւարտին Վանա Շիրվանեան ընթերցեց երեկոյի բանաձեւը, ուր ներկաները դատապարտեցին Ազրպէյճանի ռազմական գործողութիւնները եւ ամբողջական զօրակցութիւն յայտնեցին Արցախի եւ Հայաստանի պետական կառոյցներուն ու ժողովուրդին:
Հաւաքի մասնակիցները այս առիթով իրենց սրտաբուխ նուիրատուութիւնները կատարեցին` Լեռնային Ղարաբաղի իշխանութեանը եւ արցախահայութեանը զօրակցելու համար: