Պատրաստեց՝ ՄԱՐԻՆԱ ՀԱՄԱՄՃԵԱՆ
«Վիվասել-Էմ.Թի.Էս.»-ը Կը Քաջալերէ
Աշակերտական Կազմակերպութիւնները
«Ձեռնարկատիրական եւ քաղաքացիական կրթութիւն Հայաստանի Հանրապետութեան խոցելի համայնքների դպրոցների աշակերտների համար» դասընթացքի ծիրին մէջ դրամաշնորհ տրուած է աշակերտական 12 հասարակական կազմակերպութիւններու:
«Հայաստանի պատանեկան նուաճումները» կազմակերպութիւնը եղած է առաջինը, որ համագործակցական ընկերային պատասխանատուութեան վերաբերեալ գիտելիքները հանրակրթութեան ոլորտ ներմուծած է:
Գաղափարը ուսումնասիրող աշակերտներուն համար ուսանելի օրինակ հանդիսացած է «Վիվասել-Էմ.Թի.Էս.»-ի գործունէութիւնը: Այս նպատակով ալ 2011-ին «Հայաստանի պատանեկան նուաճումներ»-ու եւ «Վիվասել-Էմ.Թի.Էս.»-ի միջեւ յուշագիր կնքուած է, եւ ընկերութեան մասնագէտները ներգրաւուած են որպէս ծրագրային խորհրդատուներ:
«Շատ կարեւոր է կեանքէն քաղել օգտակարը: Այս իմաստով ողջունելի է հոս հաւաքուած պատանիներուն աշխուժութիւնը: Յաջողութեան հասնելու համար եղէք համարձակ, երբեք մի՛ անտեսէք ոեւէ մէկուն յաջողութիւն գտած փորձառութիւնը: Անիկա կրնայ ամբողջացնել հիմնական գիտելիքները` ձեզ դարձնելով առաւել հեռատես, մրցունակ եւ յաջողակ: «Վիվասել-Էմ.Թի. Էս.»-ը կը շարունակէ գնահատել եւ խրախուսել գիտելիքով զինուելու, առաւել հմտանալու` երիտասարդներու ձգտումը», ըսած է «Վիվասել-Էմ.Թի.Էս.»-ի գլխաւոր տնօրէն Ռալֆ Եիրիկեան:
Ծրագիրը կը ֆինանսաւորուի JHM բարեգործական հիմնադրամին եւ HSBC դրամատան կողմէ:
Անկախութեան 25-Ամեակի
Տօնակատարութիւնները
Մեծ Շուքով Պիտի Ըլլան
Կառավարութեան նիստին 18 մարտին տեղի ունեցած է Հայաստանի անկախութեան տօնին նուիրուած նախաձեռնութիւններու նախապատրաստման եւ կազմակերպման պետական յանձնաժողովի նիստը, զոր վարած է վարչապետ, յանձնաժողովի նախագահ Յովիկ Աբրահամեանը:
Շեշտելով, որ ասիկա Հայաստանի ամէնէն նուիրական տօնն է, վարչապետը նշած է, որ ասիկա հրաշալի առիթ է արժեւորելու, յիշելու, քննարկելու, վերլուծելու, գնահատելու մեր ձեռքբերումները: Առ այդ, ան կարեւոր նկատած է, որ յանձնաժողովը մեծ աշխատանք տանի, որպէսզի 25-ամեակը նշուի մեծ շուքով:
Այնուհետեւ վարչապետը խօսքը փոխանցած է Հայաստանի նախագահի աշխատակազմի ղեկավար, յանձնաժողովի նախագահի տեղակալ, տօնական նախաձեռնութիւնները համակարգող Վիգէն Սարգսեանին, որ անկախութեան 25-ամեակի նախաձեռնութիւններուն վերաբերեալ մանրամասնութիւններ ներկայացուցած է:
«Կ՛առաջարկեմ անկախութեան 25-րդ տարեդարձի նախաձեռնութիւններու հիմնական ուղղուածութիւնը դիտարկել հանրապետութեան նախագահին մատնանշած երկու գաղափարախօսական առանցքի` որպէս կայացած անկախ պետութիւն, պետականութիւն առաջ շարժուելու եւ անկախութեան 25-ամեայ սերունդի ձեռքբերումները ներկայացնելու գաղափարներու շուրջ», նշած է Վիգէն Սարգսեան:
Նիստին ընթացքին քննարկուած են անկախութեան 25-ամեակի խորհրդանիշի եւ կարգախօսի ընտրութեան, տօնակատարութիւններուն սփիւռքահայութեան եւ երիտասարդութեան աշխուժ մասնակցութեան, համահայկական տնտեսական համաժողովի կազմակերպման, Երեւանի եւ մարզերուն մէջ տօնական նախաձեռնութիւններու կայացման վերաբերող եւ այլ հարցեր, ներկայացուած են տարբեր առաջարկներ:
Վարչապետը, ամփոփելով քննարկումը, կարեւոր նկատած է, որ անկախութեան 25-ամեակի ձեռնարկները տեղի ունենան բարձր մակարդակով եւ յաւուր պատշաճի, եւ պատկան բոլոր գերատեսչութիւնները այս գծով համակարգուած աշխատանք տանին: Կառավարութեան ղեկավարը յանձնաժողովի անդամներուն առաջարկած է մինչեւ մարտի աւարտը նախաձեռնութիւններուն վերաբերեալ առաջարկները եւ գաղափարները ներկայացնել յանձնաժողովի քարտուղարութիւն, որմէ ետք մինչեւ 15 ապրիլ պիտի մշակուին եւ քննարկման ներկայացուին անկախութեան 25-ամեակին նուիրուած նախաձեռնութիւններու ծրագիրին նախագիծն ու ժամանակացոյցը:
23 Ապրիլին Տեղի Պիտի Ունենայ
«Ընդդէմ Ցեղասպանութեան Յանցագործութեան»
Միջազգային Համաժողով
23 ապրիլին Երեւանի մէջ տեղի պիտի ունենայ միջազգային համաժողով: 15 մարտին լրագրողներուն հետ ունեցած զրոյցին ընթացքին այս մասին յայտնած է Հայաստանի նախագահի աշխատակազմի ղեկավար Վիգէն Սարգսեան:
Ան ըսած է, որ Հայաստանի Հանրապետական կուսակցութեան խմբակցութիւնը քննարկած է «Ընդդէմ ցեղասպանութեան յանցագործութեան» խորագիրը կրող համաժողովի կայացման առնչուող հարցեր:
Հայկական Արտադրութեան Հեռաձայնները
Ապրիլին Տրամադրելի Պիտի Ըլլան
Ապրիլին շուկայի վրայ տրամադրելի պիտի ըլլան հայկական արտադրութեան հեռաձայնները, զորս 17 մարտին լրագրողներուն ներկայացուց «Թեքնոլոճի էնտ սայընս տայնամիքս» ընկերութեան ղեկավարը` նշելով, որ այդ հեռաձայններուն յիշողութիւնը փոքր է, պաստառի ապակին ալ բարձրագոյն որակի չէ, այլապէս անոնք ոչինչով կը զիջին շուկայի վրայ առկայ նմանատիպ հեռաձայններուն: Անոր համաձայն, հայկական հեռաձայններուն գինը բաւական ցած է, բայց եւ այնպէս անիկա մեծ ճանաչում չունի տակաւին, այդ պատճառով ալ մեծաքանակ պատուէրներ չկան:
Հայկական հեռաձայն արտադրողը «Արմֆոն» հեռաձայններ, «Արմթաբ» փլանշեթներ արտադրող եւ գիտահետազօտական ծրագիրներ մշակող նոյն հայկական ընկերութիւնն է, որ եղաւ առաջինը «Ալեանս» ազատ տնտեսական գօտիին մէջ գործունէութիւն ծաւալող:
2013-ի աւարտին յայտնի դարձաւ, որ Հայաստանի տեղեկատուական արհեստագիտութեան ոլորտին մէջ գործող հայ-ամերիկեան Technology and Science Dynamics Inc./Armtab Technologies ընկերութիւնը Հայաստանի մէջ առաջին հայկական փլանշեթներու արտադրութեան նախաձեռնողն է:
Ազգային Պատկերասրահը Պիտի Գործակցի
Իրանի Մեծագոյն Թանգարաններէն Մէկուն Հետ
10 մարտին Հայաստանի Ազգային պատկերասրահին եւ Թեհրանի Ժամանակակից արուեստներու թանգարանին միջեւ ստորագրուեցաւ յուշագիր, որ կ՛ենթադրէ յառաջիկային հայ եւ իրանցի նկարիչներու աշխատանքներու ցուցադրութիւններու կազմակերպում: «Ասիկա մեզի համար կարեւոր փաստաթուղթ է, որ սկիզբն է Իրանի մեծագոյն թանգարաններէն մէկուն հետ աշխատանքի: Թանգարանը բաւական լուրջ հաւաքածոյ ունի` իրանական արուեստէն մինչեւ Եւրոպայի լաւագոյն նկարիչներու աշխատանքներ», յայտնած է Հայաստանի ազգային պատկերասրահի տնօրէն Արման Ծատուրեան:
Թեհրանի ժամանակակից արուեստներու թանգարանի տնօրէն Մաճիտ Մոլլա Նորուզի նկատել տուած է, որ պատկերասրահի հետ գործակցութիւնը նոյնիսկ ուշացած է. «Հայերը եւ իրանցիները պէտք է ծանօթանան իրարու մշակոյթի գլուխ գործոցներուն: Յոյսով եմ, որ յառաջիկային հայ նկարիչներու գործերը կը ցուցադրուին Իրանի մէջ»:
Նշենք, որ 11 մարտին Ազգային պատկերասրահին մէջ բացումը կատարուած է «Իրանական արուեստ» խորագիրով ցուցահանդէսին, որուն ծիրին մէջ ներկայացուած են Իրանի ժամանակակից նկարիչներու աշխատանքները: «Ազգային պատկերասրահը աշխարհի լաւագոյն պատկերասրահներէն է, եւ ուրախ ենք այստեղ ներկայացնելու իրանցի մանրանկարիչներուն ստեղծագործութիւնները: Արուեստը եւ մշակոյթը իւրաքանչիւր ժողովուրդի հայելին են, եւ այցելուները հետաքրքրական նմուշներ պիտի տեսնեն: Մենք կը հպարտանանք անոնցմով: Իրանական մանրանկարչութիւնը բաւական մեծ համբաւ կը վայելէ, անոր միջոցով կարելի է նաեւ ծանօթանալ իրանական մշակոյթին ու գրականութեան», յայտնած է Նորուզի:
Գիւմրին Զարգացնելու Եւ Մարզերուն
Աղքատ Վիճակը Բարելաւելու Ծրագիրներ
Հայաստանի տարածքային կառավարման եւ զարգացման նախարարութիւնը ապրիլի վերջաւորութենէն սկսեալ պիտի իրականացնէ բազմաթիւ ծրագիրներ, որոնք պիտի նպաստեն աղքատութեան բարձր ցուցանիշ ունեցող մարզերու մէջ տնտեսական աշխուժացման: Այս մասին յայտնած է տարածքային կառավարման եւ զարգացման նախարար Դաւիթ Լոքեան, 16 մարտին գումարուած Ազգային ժողովի նիստին:
«Կ՛առաջարկեմ ծանօթանալ նախարարութեան կողմէ պատրաստուող տարածքներու տնտեսական զարգացման ռազմավարութեան փաստաթուղթին, զոր կառավարութիւնը հաւանաբար պիտի հաստատէ ապրիլին: Անոր հիմնական նպատակն է խթանել տնտեսութիւնը յատկապէս այն մարզերուն մէջ, ուր կայ համախառն ներքին արտադրութեան ցած մակարդակ, կը բացակային աշխատատեղերը, որուն պատճառով ալ աղքատութեան տոկոսը մեծ է», յայտնած է Լոքեան:
Խօսելով Գիւմրի քաղաքին վերաբերող ծրագիրներուն մասին` Դաւիթ Լոքեան կարեւոր եւ օգտակար նկատած է Գիւմրիի զարգացման համար Վերակառուցման եւ զարգացման եւրոպական դրամատունէն 23,5 միլիոն եւրօ վարկ ստանալու ծրագիրը: «Վարկային համաձայնագիրը ներկայիս քննարկման փուլի մէջ է եւ մինչեւ 15 ապրիլ անիկա պիտի դրուի ընթացքի մէջ: Անկէ ետք դրամատան մէջ հարցը պիտի քննարկուի, եւ եթէ Հայաստան բաւարարէ բոլոր պայմանները, ապա վարկային փաթեթը հասանելի պիտի դառնայ նոյեմբերին», ըսած է նախարարը: Նախարարը աւելցուցած է, որ փաթեթի 33,5 տոկոսը դրամաշնորհ է, մնացածը` բաւական լաւ պայմաններով վարկ: «Միշտ չի պատահիր, որ կարենանք նման վարկ ստանալ համայնքներու զարգացման ծրագիրներուն համար: Ֆինանսական տեսանկիւնէ եւս վարկի ներգրաւումը դրական է, իսկ վարկի ներգրաւման պարագային Գիւմրիի իշխանութիւնները հնարաւորութիւն կ՛ունենան Հայաստանի երկրորդ մայրաքաղաքը ուղղակի բարեկարգ քաղաքէն վերածել զբօսաշրջային կեդրոնի` կապելով Հայաստանի հիւսիսը միւս զբօսաշրջային կեդրոններուն հետ», եզրափակած է Լոքեան:
2015-ին Հայաստանի Մէջ Համացանցէն
Օգտուողներուն Թիւը Հասած Է 2,2 Միլիոնի
2015 թուականին համացանցէն օգտուողներուն թիւը հասած է 2,2 միլիոնի` ապահովելով ծածկոյթի 69 տոկոսը: Այս թիւին մէջ են շարժական հեռահաղորդակցութեան, լայնաշերտ համացանցի եւ համացանցային կապի ոլորտները:
Այս մասին նշուած է «Ձեռնարկութիւնների ինկուբատոր հիմնադրամ»-ի «Հայաստանում տեղեկատուական եւ հեռահաղորդակցութեան տեխնոլոգիաների ոլորտի հետազօտութիւն» զեկուցման մէջ, որ ամփոփուած է 2015-ին:
Զեկոյցին համաձայն, Հայաստանի մէջ համացանցի ծառայութիւններու ընդհանուր եկամուտին 94 տոկոսը կ՛ապահովուի համացանց մատակարարող հինգ մեծ ընկերութիւններուն կողմէ:
2015-ին լայնաշերտ համացանցի (որոնց կարգին 3 Ճի.ն) ծառայութիւններէն օգտուողներուն թիւը հասած է մօտ 2 միլիոնի, իսկ անթել (WiMax4 WiFi) ծառայութիւններու բաժանորդներուն թիւը հասած է 247 հազարի:
Նախորդ տարուան աւարտին 3 Ճի. կապի ծածկոյթը հասած է 98 տոկոսի: Անթել ցանցերով տուեալներու փոխանցումը եւ համացանցի կապի ծառայութիւնները կը կազմակերպուին GSM/EDGE, UMTS 2100 եւ UMTS 900 արհեստագիտական միջոցով:
2015-ի դրութեամբ հեռաձայնային ծառայութիւններէն օգտուողներուն թիւը կազմած է 534 հազար:
Զեկոյցը կը հաստատէ, որ շարժական կապի ծառայութիւններէն ստացուած եկամուտները մեծագոյն կշիռը ունին Հայաստանի հեռահաղորդակցութեան ոլորտի եկամուտներուն մէջ:
«Հայաստանի Ելեկտրական Ցանցեր» Ընկերութիւնը
Գիւմրիի 10 Ընտանիքներու
Բնակարաններ Պիտի Տրամադրէ
«Հայաստանի ելեկտրական ցանցեր» ընկերութեան բաժնետէր Սամուէլ Կարապետեանի որոշումով, ընկերութեան եւ «Գիւմրին առանց տնակների» հիմնադրամին միջեւ 18 մարտին կնքուած է նուիրատուութեան համաձայնագիր` Գիւմրի քաղաքի տնտեսական ծանր վիճակի մէջ եւ տնակներուն մէջ բնակող տասը ընտանիքներու բնակարաններ տրամադրելու նպատակով:
Ընկերութեան աշխատակազմին կողմէ պիտի ընտրուին ծայրայեղ ծանր պայմաններու մէջ ապրող այն ընտանիքները, ուր երեխաներ, հաշմանդամներ ու տարեցներ կան:
Համաձայնագիրը նաեւ կը նախատեսէ սեփականութեան իրաւունքով յանձնուող գոյքին նկատմամբ իրաւունքներու որոշ եւ ժամանակաւոր սահմանափակումներ, ինչպէս` վաճառելը, փոխանցելը, վարձու տալն ու գրաւադրելը:
Բացի ատկէ, ընկերութեան ղեկավար անձնակազմին եւ պաշտօնէութեան անձնական միջոցներով պիտի գնուի երկու բնակարան եւս` առաջնորդուելով զանոնք տրամադրելու նոյն սկզբունքներով: