ՀՅԴ անդամ, գիւղատնտեսութեան նախկին նախարար Արթուր Խաչատրեանը խորհրդարանական արտակարգ ընտրութիւններուն ՀՅԴ Հայաստանի Գերագոյն մարմինին կողմէ առաջադրուեցաւ ՀՅԴ համամասնական ցանկով: «Ես վստահ եմ, որ մենք կը յաղթենք, որովհետեւ մենք իրական այլընտրանք ենք: Մեր խնդիրն այժմ ուղղակի յետյեղափոխական զարգացումն է, յեղափոխականութեան էջը պէտք է փակել եւ գնալ երկրի զարգացման», «Թերթ»-ին հետ ունեցած զրոյցին ընթացքին ըսած է Ա. Խաչատրեանը:
Ընտրութիւններուն յաջողութեան հասնելու պարագային, ան չի բացառեր համագործակցութիւնը ՔՊ-ի, ՀՀԿ-ի կամ այլ ուժերու հետ. «Համագործակցում են խնդիրների իրականացման շուրջ: Եթէ ՔՊ-ն որոշակի խնդիր է դնում, որը մեզ համար ընդունելի է եւ ճիշդ է, մենք համագործակցելու ենք ՔՊ-ի հետ, եթէ խնդիր է դնում ՀՀԿ-ն, ԲՀԿ-ն կամ այլ ուժ, նրանց հետ ենք համագործակցում»:
«ԹԵՐԹ».- Ընդհանրապէս, ընտրութիւններում ձեր անհատական եւ կուսակցութեան շանսերն ինչպէ՞ս էք գնահատում:
ԱՐԹՈՒՐ ԽԱՉԱՏՐԵԱՆ.- Դրակա՛ն: Մենք ունենք մեր յստակ դիրքորոշումը, մեր սկզբունքները եւ կարող ենք լինել իրական այլընտրանք` հանդէս գալով ազգային արժէքների պահպանման եւ ընկերային արդարութեան միջեւ:
«ԹԵՐԹ».- Կարծո՞ւմ էք, որ ՀՅԴ-ն խորհրդարանում նուազագոյնը ներկայացուած 3 ուժերից մէկն է լինելու:
ԱՐԹՈՒՐ ԽԱՉԱՏՐԵԱՆ.- Ընտրութիւններից առաջ կանխատեսում անելը ճիշդ չէ, բայց, ի հարկէ, այդպէս եմ կարծում: Ես լիայոյս եմ, վստահ եմ, որ մենք կը յաղթենք, որովհետեւ մենք իրական այլընտրանք ենք, մենք աջակցել ենք յեղափոխութեանը, մեր խնդիրն ուղղակի յետյեղափոխական զարգացումն է: Յեղափոխականութեան էջը պէտք է փակել եւ գնալ երկրի զարգացման: Մենք տեսնում ենք որոշակի վտանգներ թէ՛ երկրի զարգացման ուղղութեամբ, թէ՛ ընկերային-տնտեսական քաղաքականութիւնում, մասնաւորապէս` այդ 100 հազար հոգուն դուրս թողնելը հանրային հատուածից, 800 հազար հոգուն «բեռ» կոչելը: Վտանգներ ենք տեսնում նաեւ արտաքին քաղաքականութիւնում, եւ այստեղ մենք ունենք մեր մօտեցումներն ու պատկերացումները:
«ԹԵՐԹ».- Վարչապետի խորհրդականի` 100 աշխատակիցներին պետական կառոյցից կրճատելու եւ Նիկոլ Փաշինեանի` «350 հազար մարդ ճռռում է, որ պահի 800 հազար մարդու» յայտարարութիւնների մասի՞ն է խօսքը:
ԱՐԹՈՒՐ ԽԱՉԱՏՐԵԱՆ.- Այո՛, պետութիւնը չի կարող այդպէս անել: Այսինքն պետութիւնը պէտք է պատասխանատու լինի բոլորի նկատմամբ:
«ԹԵՐԹ».- Ներկայիս իշխանութեան ներկայացուցիչները յայտարարում են, որ պետական կառոյցն ուռճացուած է, պէտք է կրճատումներ լինեն, եւ պետական ծառայողները սեփական մարզում տեղաւորուեն:
ԱՐԹՈՒՐ ԽԱՉԱՏՐԵԱՆ.- Նախ պէտք է այլընտրանք ստեղծել այդ մարդու համար: Եթէ դու իր համար այլընտրանք չես ստեղծում, նրան ուղղակի շպրտում ես դուրս: Իսկ հաշուի առնելով մեր ազգի շարժունակութիւնը` այդ մարդն իր տունը կը վաճառի, ճամպրուկը կը հաւաքի եւ երկրից կը գնայ: Առանց այդ էլ ժողովրդագրական աղէտի առաջ ենք կանգնած, հիմա էլ թողենք, որ եւս 50-100 հազար հոգի՞ գնան:
«ԹԵՐԹ».- Դաշնակցութիւնը 2016 թ.ին ՀՀԿ-ի հետ էր քոալիսիոնի մէջ, այնուհետեւ դուրս եկաւ, հետագայում «Քաղաքացիական պայմանագրի» հետ ազգային համաձայնութեան կառավարութիւն ձեւաւորեցիք եւ մի քանի ամիս անց դուրս եկաք, նաեւ ընտրական օրէնսգրքի փոփոխութիւնների նախագծի տապալման համար շատերը ՀՅԴ-ին էին մեղադրում: Այդ վերջին տարիների իրադարձութիւնները չե՞ն ազդի ՀՅԴ ձայների վրայ:
ԱՐԹՈՒՐ ԽԱՉԱՏՐԵԱՆ.- Երկու պատգամաւոր չեն եկել, բայց քանի՞ հոգի չեն եկել, ովքեր իրենց հաւատարմութիւնն էին յայտնել վարչապետին եւ իշխող քաղաքական խմբին: Նրանք, ովքեր քննադատում էին ՀՅԴ-ին անձրեւ գալու կամ շոգ լինելու համար, միեւնոյն է, մեր ընտրազանգուածը չեն: Տեսէ՛ք` մենք ՀՀԿ-ի հետ 1998 թ.ից ենք եղել, այն ժամանակ, երբ Լեւոն Տէր Պետրոսեանը գնաց, երկրին սպառնաց սոդոմ-գոմորով, պատերազմով, մերժում էր Ցեղասպանութեան միջազգային ճանաչման անհրաժեշտութիւնը, «Պատերա՞զմ, թէ՞ խաղաղութիւն. լրջանալու պահը» յօդուածն էր գրել, եւ այստեղ արդէն պէտք էր պետութիւնն ուժեղացնել, եւ թէ՛ Ղարաբաղի, թէ՛ Ցեղասպանութեան ճանաչման ու պահանջատիրութեան հարցում հզօր դիրքորոշում էր պէտք որդեգրել: Բայց վերջին մի քանի տարիների փորձը մեզ ցոյց տուեց, որ երկրում, քանի դեռ չի ձեւաւորուել իրական քոալիսիոն կառավարում, որտեղ կառավարութեան մասնակցութիւնը պայմանաւորուած է ԱԺ-ում մասնակցութեամբ, կառավարութիւնում մասնակցելն այդքան էլ ճիշդ մօտեցում չէ: Մենք կառավարութեան մաս էինք, որոշակի յաջողութիւնների հասանք, բայց յաջողութիւնների հետ մէկտեղ նաեւ, փաստօրէն, կրել ենք ձախողումների պատասխանատուութիւնը:
«ԹԵՐԹ».- Առաջիկայ ԱԺ ընտրութիւններին ՀՅԴ-ն առանձի՞ն է մասնակցելու:
ԱՐԹՈՒՐ ԽԱՉԱՏՐԵԱՆ.- Այո՛:
«ԹԵՐԹ».- Ընտրութիւններում յաջողութեան հասնելու դէպքում ՀՀԿ-ի կամ ՔՊ-ի եւ կամ այլ ուժի հետ համագործակցութիւնը հնարաւոր համարո՞ւմ էք:
ԱՐԹՈՒՐ ԽԱՉԱՏՐԵԱՆ.- Համագործակցում ենք խնդիրների իրականացման շուրջ: Եթէ ՔՊ-ն որոշակի խնդիր է դնում, որը մեզ համար ընդունելի է եւ ճիշդ է, մենք համագործակցելու ենք ՔՊ-ի հետ, եթէ խնդիր է դնում ՀՀԿ-ն, ԲՀԿ-ն կամ այլ ուժ, նրանց հետ ենք համագործակցում:
Այսինքն համագործակցում ենք ոչ թէ կուսակցութիւնների հետ, այլ համագործակցութեան հիմքը խնդիրն է, որը պէտք է լուծել, ու նաեւ ընդդիմութեան հիմքն է խնդիրը, որը պէտք է լուծել: