ԺԱԳ ՔԷՇԻՇԵԱՆ
Շաբաթ, 29 սեպտեմբեր 2018-ի առաւօտեան ժամը 10:30-ին Հռոմի Ս. Նիկողայոս հայ կաթողիկէ եկեղեցւոյ մէջ հայրապետական սուրբ եւ անմահ պատարագ մատուցեց Գրիգոր Պետրոս Ի. կաթողիկոս պատրիարք Տանն Կիլիկիոյ կաթողիկէ հայոց: Պատարագի ընթացքին եպիսկոպոսական ձեռնադրութիւն տեղի ունեցաւ Լատին Ամերիկայի նորընտիր առաջնորդ Պօղոս Լեւոն ծ. վրդ. Հաքիմեանի` ձեռամբ հոգեւոր տիրոջ, ունենալով իր քով երկու ձեռնադրակից եպիսկոպոսներ` Վարդան եպս. Պօղոսեանը` վաստակաւոր առաջնորդ Լատին Ամերիկայի հայ կաթողիկէ թեմի եւ Գէորգ եպս. Ասատուրեանը` Պէյրութի թեմի պատրիարքական փոխանորդ:
Արարողութեան ներկայ գտնուեցան` կարտինալ Լէոնարտօ Սանտրին` Արեւելեան եկեղեցիներու ժողովի նախագահ, Ռաֆայէլ արք. Մինասեանը` Հայաստանի, Վրաստանի, Ռուսիոյ եւ արեւելեան Եւրոպայի առաջնորդ, Օգոստինոս Գրիգոր եպս. Գուսանը` Եգիպտոսի թեմի առաջնորդ եւ պատրիարքական փոխանորդ Երուսաղէմի եւ Յորդանանի թեմերու, Յովսէփ թ. ծ. վրդ. Պէզէզեանը` Յունաստանի թեմի առաքելական կառավարիչ, վարդապետներ, քահանաներ, քոյրեր, Հաքիմեան ընտանիքը եւ հաւատացեալներու հոծ բազմութիւն մը:
Ձեռնադրութեան առաջին մասը տեղի ունեցաւ ուրբաթ, 28 սեպտեմբեր 2018-ին, երեկոյեան ժամը 18:45-ին, յաւարտ երեկոյեան ժամերգութեան: