26 սեպտեմբեր 2018-ին Հայ կաթողիկէ Մեսրոպեան բարձրագոյն վարժարանին աշակերտութիւնը, ուսուցչական կազմն ու ծնողները տօնական մթնոլորտի մը մէջ նշեցին վարժարանի 80-րդ կրթական տարեշրջանին սկիզբը:
Ծնողներուն եւ աշակերտներուն առջեւ արտասանած իր խօսքին մէջ տնօրէն Կրեկուար Գալուստ դիտել տուաւ, որ նոր տարեշրջանը Մեսրոպեանին համար յոբելենական է, քանի որ անիկա կը զուգադիպի վարժարանի հիմնադրութեան 80-ամեակին, որուն նուիրուած շարք մը ձեռնարկներ տեղի պիտի ունենան: Ան ըսաւ, որ 80-ամեայ Մեսրոպեանը մեծ աւանդ ունեցաւ լիբանանահայ սերունդներու կեանքին մէջ եւ մեծապէս նպաստեց ընկերութեան զարգացումին, որուն ի խնդիր` այս տարիէն սկսեալ դպրոցին մէջ ի գործ պիտի դրուին շարք մը նոր ծրագիրներ: Կ. Գալուստ անդրադարձաւ հայեցի դաստիարակութեան կարեւորութեան` դիտել տալով, որ Մեսրոպեանը հաւատարիմ է հայ ազգային, մշակութային եւ հոգեւոր արժէքները սերունդներուն փոխանցելու ուսումնական ուղեգիծին` տիպար մարդ, տիպար հայ եւ տիպար քաղաքացի կազմաւորելու իր առաքելութեան:
Վերամուտին առիթով վարժարանի շրջափակին մէջ կայացած հաւաքին, աշակերտներուն եւ ուսուցիչներուն կողքին, զգալի էր ծնողներու մեծաթիւ ներկայութիւնը: Մթնոլորտի ջերմութեան նպաստեց գեղարուեստական փոքր յայտագիրը, որ եզրափակուեցաւ ներկաներու ուրախ շուրջպարով: Այնուհետեւ աշակերտները բարձրացան դասարաններ, ուր անոնց կը սպասէին 80-ամեակի առիթով նուէրներ` տետրեր եւ գրենական պիտոյք:
Անցեալ տարի վարժարանի ակադեմական եւ արհեստից ճիւղերու 119 աշակերտներ յաջողեցան պետական քննութիւններուն` յաջողութեան խառն համեմատութիւնը հասցնելով աւելի քան 96 առ հարիւրի: Նոր տարեշրջանին Մեսրոպեանի մէջ գործադրութեան պիտի դրուի եռամեայ նոր ծրագիր մը, որուն նպատակն է արմատապէս բարեփոխել դպրոցին կրթական դրութիւնը:
Մեսրոպեանի Մէջ Կայացան Ուսուցիչներու Եւ
Հսկիչներու Վարժողական Սեմինարներ
Սեպտեմբեր 21-ին Հայ կաթողիկէ Մեսրոպեան բարձրագոյն վարժարանին մէջ կայացան ուսուցիչներու եւ անձնակազմի վարժողական երկու առանձին սեմինարներ` առ ի պատրաստութիւն նոր տարեշրջանին եւ իբրեւ բաղկացուցիչ մաս դպրոցին մէջ ընթացք առած բարեփոխումներուն:
Առաջին սեմինարին կրթական խորհրդատուութեան «Ուազնաթ» կազմակերպութեան տնօրէն Սամիր Քոնսթանթինը Մեսրոպեանի ուսուցիչներուն հետ քննարկեց դասարանային կառավարման խնդիրները եւ ներկայացուց այդ խնդիրներու լուծման հայեցակարգ` հիմնուած մանկավարժական մօտեցումներու եւ աշակերտներու տարիքային հոգեբանութեան առանձնայատկութիւններուն վրայ: Դասախօսին առաջնորդութեամբ, ուսուցիչները խմբաւորեցին դասարանի կառավարման մէջ նկատուած խնդիրները եւ հաստատեցին որոշակի ուղեցոյց` իւրաքանչիւրի լուծման համար:
Երկրորդ սեմինարը վարեց նոյն կազմակերպութեան աշխատակից Միշէլ Աքրան, որ Մեսրոպեանի հսկիչ անձնակազմին ներկայացուց հսկողական գործառոյթին կանոններն ու յատկանիշները, ինչպէս նաեւ` զբօսանքներու կառավարման պահանջները:
Մեսրոպեան վարժարանը անցած տարուան վերջաւորութեան գործակցութեան համաձայնագիր կնքած էր «Ուազնաթ» կրթական խորհրդատուութեան հիմնարկին հետ` նպատակադրելով բարձրացնել աշակերտներուն կրթական մակարդակը, ամրապնդել ուսուցիչներուն գիտելիքները, ինչպէս նաեւ` օգտակար դառնալ ծնողք-զաւակ հաղորդակցութեան խնդիրներու լուծման: