Ուրբաթ, 15 յունուար 2016-ին, Թէքէեան կեդրոնին մէջ, Ժըմմէյզի, երեկոյեան ժամը 7:00-ին տեղի ունեցաւ ՌԱԿ Հայ իրաւանց խորհուրդին կազմակերպած «Ցեղասպանութիւն. 100-ամեակ» խորագիրը կրող ձեռնարկը` հովանաւորոթեամբ ՌԱԿ-ի Լիբանանի Շրջանային վարչութեան եւ գործակցութեամբ «Զարթօնք» օրաթերթին:
Բացման խօսքով հանդէս եկաւ ՌԱԿ Հայ իրաւանց խորհուրդի ատենապետ Վիգէն Ասիլեան, որ ըսաւ, թէ հաւաքը նպատակ կը հետապնդէ ոչ միայն արժեւորում կատարել Հայոց ցեղասպանութեան 100-ամեակի գործունէութիւններուն, այլեւ արծարծել «100-ամեակէն յետոյ ի՞նչ» հարցադրումը:
Ապա ներկաները դիտեցին եւ ունկնդրեցին սփիւռքի նախարար Հրանուշ Յակոբեանի արտասանած խօսքը` նոյն հաւաքին առիթով: Նախարարը ըսաւ. «Հայոց պատմութեան հոլովոյթին մէջ յաւերժ կը մնայ 2015 տարին, որուն ընթացքին մենք կրցանք աշխարհին ցոյց տալ , թէ ո՛վ է հայը. ի՛նչ է Հայ դատը, որքա՜ն երախտապարտ ու շնորհակալ է հայ ժողովուրդը, եւ ի՞նչ կը պահանջէ մարդկութենէն, աշխարհէն եւ Թուրքիայէն»:
Օրուան հանդիսավարն էր դոկտ. Անդրանիկ Տագէսեան: Ան հրաւիրեց ներկաները անդրադառնալու օրակարգի առաջին կէտին, որ էր քննական արժեւորում Լիբանանի մէջ Հայոց ցեղասպանութեան 100-ամեակի ոգեկոչման ձեռնարկներուն: Այս օրակարգով զեկուցեցին Սեդա Խտըշեան եւ Ռաֆայէլ Ումուտեան: Սեդա Խտըշեան ըսաւ, որ Հայոց ցեղասպանութեան 100-ամեակի Լիբանանի Կեդրոնական մարմինին իրականացուցած ծրագիրները չէին փառասիրեր քաղաքական նուաճումներ արձանագրել, եւ ոչ ալ պետական մակարդակով կամ գիտական ուսումնասիրութիւններով Հայոց ցեղասպանութեան դատական, իրաւական առաջարկութիւններու ձեւակերպում մը բանաձեւել: Մարմինը կեդրոնացած էր առաւելաբար ժողովրդային մակարդակով կազմակերպուելիք նշումներուն վրայ, որոնք անպայմանօրէն կը ձգտէին քարոզչական անդրադարձ ունենալ` հասնելով լիբանանեան եւ միջազգային հասարակութեան: Հիմնական կիզակէտը կը մնար միշտ նորահաս սերունդին մէջ ամրագրելու անժամանցելիութիւնը ազգային պահանջատիրութեան` յանձնառու դարձնելով զիրենք ազգային դատին եւ Հայոց ցեղասպանութեան արդար իրաւունքներու պահանջատիրութեան գործընթացին:
Ռաֆայէլ Ումուտեան ըսաւ, թէ ձեռնարկները հայութեան եւ յատկապէս լիբանանահայութեան կեանքին մէջ յառաջացուցին նոր ազդակներ, որոնք զարթօնք եւ Արարատը նուաճելու կամքի վերահաստատում` գործակցութեան եւ համերաշխութեան ոգիով ամրացած: Իսկ «Զարթօնք» օրաթերթի գլխաւոր խմբագիր Սեւակ Յակոբեան ներկայացուց Հայոց ցեղասպանութեան 100-ամեակի ոգեկոչման Լիբանանի ձեռնարկներուն նուիրուած «Զարթօնք»-ի յաւելուածը: Ան ըսաւ, որ լոյս տեսած յաւելուածը փորձ մըն է անցնող տարուան 36 ձեռնարկներու հաղորդագրութիւններն ու թղթակցութիւնները համատեղելու:
Դադարէ մը ետք ելոյթ ունեցաւ Լիբանանի տեղեկատուութեան նախարարի ներկայացուցիչ Ալպեր Կոստանեան, որ կարդաց նախարար Ռամզի Ժրէյժին շնորհաւորագիրը Հայոց ցեղասպանութեան 100-ամեակի ոգեկոչման Լիբանանի Կեդրոնական մարմինին, որմէ ետք պատուոյ գիր մը յանձնեց տարուած բեղուն աշխատանքին համար: Ապա Յակոբ Գասարճեան, Միքայէլ Վահրիճեան եւ Արտեմ Պիւլպիւլեան երախտագրեր յանձնեցին 100-ամեակի Լիբանանի Կեդրոնական մարմինի անդամներուն:
Ձեռնարկին ելոյթ ունեցան նաեւ հայր Անդրանիկ ծ. վրդ. Կռանեան եւ վերապատուելի դոկտ. Փոլ Հայտոսթեան, որոնք ներկայացուցին «100-ամեակէն ետք ի՞նչ. հայկական օրակարգը յաջորդ հանգրուանին» նիւթը: Հայր Անդրանիկ Կռանեան իր խօսքին մէջ շեշտեց, որ գալիք տասնամեակներուն սերունդները հայ պահպանելը աւելի արթուն աշխատանք պիտի պահանջէ սփիւռքահայութենէն: Իսկ Հայաստան-սփիւռք միասնաբար եւ համատեղ աշխատանքով հետապնդել եւ Հայ դատին միջազգային տարազ եւ բանաձեւում տալ, որպէսզի միաձեւ ու ամբողջական պահանջ մը ներկայացուի ՄԱԿԻ-ն:
Իսկ վեր. դոկտ. Փոլ Հայտոսթեան հայութիւնը 100-ամեակէն դէպի կայուն ապագայ փոխադրելու նպատակով ներկայացուց համահայկական առաջադրանքներ եւ հրամայականներ, որոնց կիզակէտը կը դառնայ հայ անհատը, հայ ինքնութեան հարցերը, հայկական միասնականութիւնը, Հայաստանի Հանրապետութեան եւ Լեռնային Ղարաբաղի Հանրապետութեան զարգացումը, Հայոց դէմ գործուած ցեղասպանութեան նիւթի հետապնդումը եւ Հայ դատը, Հայաստան-սփիւռք կապերը, սփիւռքի հաստատութիւներու կայունութիւնը եւ ապագայ հայկական հաղորդական կալուածի առաքելութեան ռազմավարական մօտեցումը, վերլուծումի, ուսումնասիրական եւ զարգացման տեսիլք մշակող հաստատութիւններու մղում տալը:
Օրակարգի այս բաժինին իրենց մասնակցութիւնը բերին նոր սերունդի ներկայացուցիչներ` Արին Ղազարեան, Մարիա Չոքաքլեան եւ Արամ Գարատաղլեան:
Ձեռնարկին փակումը կատարեց Անդրանիկ Տագէսեան: