Image may be NSFW.
Clik here to view.
Image may be NSFW.
Clik here to view.
Կ՛ուզենք մեր ժողովուրդի զաւակներուն յայտնել, որ շինարարական կարեւոր ծրագիրներ իրագործման ընթացքի մէջ են արդէն` Անթիլիասի մայրավանքին, Պիքֆայայի Ս. Աստուածածին վանքին եւ «Թռչնոց բոյն»-ին մէջ:
1) Անթիլիասի մայրավանք.- ա) Հայաստանի Ա. Հանրապետութեան 100-ամեակին առիթով յուշակոթող մը կը բարձրանայ մայրավանքի շրջափակէն ներս` բարերարութեամբ տէր եւ տիկին Ալեքքօ եւ Անի Պէզիքեաններու, Զուիցերիայէն: Յուշակոթողին պաշտօնական բացումը տեղի պիտի ունենայ ուրբաթ, 23 մարտ 2018-ին, Հայաստանի Ա. Հանրապետութեան նուիրուած համազգային համագումարի աւարտին: բ) Մայրավանքի արեւելեան ու հիւսիսային կողմերը նոր պատեր կը բարձրացուին` գեղակերտ քարերով հիւսուած, որ, միաժամանակ, մայրավանքի շրջապատէն ներս պիտի ներառէ արեւելեան կողմը գտնուող պարտէզը: Սոյն ծրագիրը կ՛իրագործուի բարերարութեամբ Արամ եւ Րաֆֆի Մալեան եղբայրներուն, Լիբանանէն: Աշխատանքը իր աւարտին կը հասնի շուրջ մէկ ամիսէն:
2) Պիքֆայայի Ս. Աստուածածին վանք.- Պիքֆայայի Ս. Աստուածածին վանքին մէջ եպիսկոպոսներու եւ հիւրերու յատուկ նոր շէնք մը կը կառուցուի: Շինարարական աշխատանքները պիտի աւարտին շուրջ մէկ տարիէն:
Այս առիթով յայտնենք, որ Ֆանարի մէջ գտնուող նախկին Խանամիրեան դպրոցին շէնքը, որ սեփականութիւնն է Կաթողիկոսարանին, ներքին որոշ փոփոխութիւններէ ետք պիտի սկսի գործածուիլ կաթողիկոսարանին առնչուած ծրագիրներու համար:
Նաեւ յայտնենք, որ «Թռչնոց բոյն»-ի մէջ յատուկ բաժին մը պիտի վերակառուցուի ու վերադասաւորուի` որբերուն որպէս ննջարան գործածուելու: Այս ծրագիրին բարերարն է Տիանա Տէր Յովսէփեանը, Արժանթինէն: Աշխատանքները շուտով կը սկսին:
