Եւրոպական խորհրդարանի անդամ Լարս Ատաքթուսոնի գլխաւորած պատուիրակութիւնը 25 յունուարին այցելած է Արցախի Հանրապետութեան նախագահ Բակօ Սահակեանին: Հանդիպումին կը մասնակցէին Արցախի Հանրապետութեան Ազգային ժողովի նախագահի տեղակալ Վահրամ Բալայեանը, ՀՅԴ Հայ դատի Եւրոպայի յանձնախումբի ղեկավար Գասպար Կարապետեանը եւ պաշտօնատար այլ անձեր:
«Արցախփրես»-ի թղթակիցի հաղորդումով, յունուար 27-ին կայացած մամուլի ասուլիսի ժամանակ Եւրոպական խորհրդարանի արտաքին յարաբերութիւններու յանձնաժողովի անդամ Լարս Ատաքթուսոնը ըսած է. «Շատ տպաւորուած եմ Արցախի ժողովուրդով: Ի հարկէ, այստեղ մենք գործ ունինք հասարակութեան մը հետ, որ ճնշման տակ կը գտնուէր, բայց ասիկա ժողովուրդ մըն է, որ կը ձգտի ապրիլ լաւ կեանքով եւ կառուցել ժողովրդավարութիւն: Իմ մեծագոյն ցանկութիւնն է, որ օր մը Արցախը եւ Ազրպէյճանը կողք-կողքի կարենան ապրիլ խաղաղութեամբ, եւ հակամարտութիւնը լուծում գտնէ»:
Ամփոփելով երկօրեայ այցը` պատգամաւորը ըսած է, որ տարբեր հանդիպումներ ունեցած է Արցախի Հանրապետութեան նախագահին, Ազգային ժողովի նախագահին, Եւրոպայի հետ բարեկամութեան խումբի անդամ պատգամաւորներու, կրթութեան, գիտութեան ու մարզական, մշակոյթի, երիտասարդութեան ու զբօսաշրջութեան, արտաքին գործերու նախարարներուն, ինչպէս նաեւ բրիտանական ոչ կառավարական «Halo Trust» ականազերծող կազմակերպութեան ներկայացուցիչներուն հետ, ծանօթացած է անոնց կողմէ տարուող աշխատանքներուն:
«Այս շատ կարճ ժամանակահատուածին մէջ մենք ունեցանք ուսուցողական եւ յագեցած ծրագիր, որուն ընթացքին շատ տեղեկութիւններ հաւաքեցինք: Հակառակ անոր որ իմ այցելութիւնս անհատական բնոյթ կը կրէր, այնուամենայնիւ, շատ կարևոր են նման այցերը` Արցախի մասին աւելի ընդհանուր և խորը պատկերացում ունենալու համար: Ես Եւրոպական խորհրդարանի մէջ արտաքին յարաբերութիւններու յաձնաժողովի անդամ եմ, բայց միեւնույն ժամանակ` մարդու իրաւունքներու ենթայանձնաժողովի անդամ, եւ մարդու իրաւունքները իմ աշխատանքիս մէջ կեդրոնական տեղ կը զբաղեցնեն: Մենք մեր տարբեր հանդիպումներուն ընթացքին քննարկած ենք նոր սահմանադրութիւնը, մարդու իրաւունքները եւ հակամարտութեան ամբողջ տողատակը: Մարդու իրաւունքները շատ կարևոր են, քանի որ անոնք որեւէ ժողովրդավարութեան հիմքն են, անկիւնաքարը: Ես գիտեմ, որ ԵԱՀԿ Մինսքի խումբը կը ղեկավարէ ղարաբաղեան հակամարտութեան կարգաւորման գործընթացը, բայց կը կարծեմ, որ, ընդհանրապէս, մենք` եւրոպացիներս, պէտք է աւելի աշխուժ դեր խաղանք խաղաղութեան տարբեր նախաձեռնութիւններու մէջ, որպէսզի երկխօսութիւնը աւելի աշխուժ ընթանայ: Խաղաղութիւնը եւ կայունութիւնը շատ կարևոր են այստեղ ապրող մարդոց համար, բայց ատոնք կարեւոր են նաեւ եւրոպացիներուն համար», ըսած է Եւրոպական խորհրդարանի պատգամաւորը:
Լարս Աթաքթուսոնի գրասենեակի տնօրէն Չարլի Վէյմարսն ալ անդրադարձած է Արցախի մէջ տեղի ունեցող քաղաքական զարգացումներուն` մասնաւորապէս նշելով, որ սահմանդրական փոփոխութիւնները շատ բնական գործընթաց են ժողովրդավարութեան համար, եւ հարկ է ընդգծել, որ փոխուած է դատաւորներու նշանակուելու կարգը:
«Կը կարծեմ` ժողովրդավարական զարգացումն Արցախի մէջ ճիշդ ուղղութեամբ կ՛ընթանայ: Եւ այն փաստը, որ դատաւորները կ՛ընտրուին խորհրդարանին կողմէ, արդէն իսկ ցոյց կու տայ, որ դատաւորներու ընտրութեան գործընթացը կ՛ապաքաղաքականացուի: Դուք ուղղուած էք դէպի Եւրոպա, եւ օրէնքի գերակայութիւնը եւրոպական հասարակութեան, քաղաքական համակարգերու ամենագլխաւոր բաղադրիչներէն է, բայց ատոր կողքին, շատ կարևոր է մարդոց կեանքի որակը բարելաւելու սկզբունքը եւ նպատակը: Մենք տեսանք այստեղ այդ կամքը, որուն համար շատ ուրախ ենք»,- ըսած է Չարլի Վէյմարսը:
Ասուլիսին ներկայ ՀՅԴ Հայ դատի Եւրոպայի յանձնախումբի ղեկավար Գասպար Կարապետեանն ալ նշած է, որ իրենց աշխատանքին մեծ մասը նուիրուած է Արցախի ժողովուրդի ինքնորոշման իրաւունքին, աւելի բարեկեցիկ կեանք ունենալուն, եւ իրենք իրենց ուժերու ներածին չափով պիտի փորձեն իրական ապագայ ստեղծել ժողովուրդի համար:
«Այս շրջանին մեր հիմնական աշխատանքն է շփման գիծին վրայ տեղադրել ԵԱՀԿ Մինսքի խումբի նախաձեռնութեամբ անվտանգութեան համակարգը, որ պէտք է ստուգէ, թէ ո՛ր կողմը կը խախտէ զինադադարը, որպէսզի մեր երիտասարդները չտուժեն: Այս տարի կը լրանայ արցախեան շարժման 30-ամեակը, Հայաստանի Ա. Հանրապետութեան եւ Արցախի առաջին համագումարի 100-ամեակը: Այս տարի պէտք է փորձենք մինչեւ տարեվերջ ունենալ զանազան ձեռնարկներ` նշելու մեզի համար շատ կարեւոր այս իրադարձութիւնները», ըսած է Գ. Կարապետեանը:
Ասուլիսին Լարս Աթաքթուսոնը պատասխանած է նաև լրագրողներու կողմէ հնչած հարցերուն: