ԵՍԱՅԻ ՀԱՒԱԹԵԱՆ
Արիւնոտ դրօշ մեր ազատութեան
Ծածանեց ընդդէմ բռնակալութեան,
Յոյսով լեցուեցաւ սիրտը հայութեան,
Երկիւղը պատեց կայսեր Օսմանեան:
Արի՛ք, հայկազո՛ւնք, գոչենք միաձայն,
Սրտագին գոչենք – կեցցէ Հայաստան,
Կեցցէ Հայաստան եւ ազատութիւն,
Հայրենեաց պաշտպան քաջ ֆիտայութիւն:
Չըմնանք, հայե՛ր, օտար լուծի տակ,
Հերիք է հայուն այսքան համբերել,
Թող չծաղրէ մեզ անգութ թշնամին,
Մինչեւ որ հասնինք մեր նպատակին,
Սիրենք միութիւն, չանենք վատութիւն,
Միշտ բարձր պահենք Հայաստան անուն:
Սիրելի՛ ընթերցող. գիտեմ, որ զարմացած ու զայրացած ես, որովհետեւ այս յեղափոխական երգը տասնամեակներով երգուած է, բայց բառերը այսպէս չէին: Ամէն մարդ գիտէ, որ արիւնոտ դրօշը վեհ Դաշնակցութեանն է, հայրենեաց պաշտպանը վեհ Դաշնակցութիւնն է, եւ միշտ բարձր պահենքը ՀՅԴ անունն է:
Հիմա գանք մեր բուն խնդիրին:
Նոր տարին դիմաւորելէ ետք մեր քաղաքամայր Երեւանի կեդրոնական հրապարակին վրայ` դարձեալ համերգ է, յունուար 1-ի երեկոյեան` Օփերայի հրապարակին վրայ: Տօնական եւ ջերմ մթնոլորտը տիրական է ամէն տեղ: Խօսնակը կը շնորհաւորէ հայ ժողովուրդի Նոր տարին եւ կը յայտնէ, որ 2018-ը յիշատակելի տարի պիտի ըլլայ հայութեան համար, որովհետեւ ազգովին պիտի յիշատակենք Հայաստանի Ա. Հանրապետութեան 100-ամեակը եւ մեծ շուքով պիտի տօնենք մեր մայրաքաղաքի հիմնադրութեան 2800-րդ տարեդարձը: Տեղին եւ խօսուն:
Ներկաներուն թիւը աստիճանաբար աճ կ՛արձանագրէ, եւ խանդավառութեան ալիքը կը տարածուի` հասնելով շա՜տ հեռուները:
Տուն վերադարձին, Հ1 պատկերասփիւռի կայանէն հաճելի էր հետեւիլ մեր սրտին մօտիկ Յարութ Փամպուքճեանի փառաւոր երգահանդէսին, որ կայացած էր Երեւանի մէջ:
Փամպուքճեանը երգահանդէսի աւարտին կը կատարէ նաեւ «Արիւնոտ դրօշ»-ը: Հոս է, որ յանկարծ պաղ ջուր կը թափի մեր տրամադրութեան վրայ: «Արիւնոտ դրօշ»-ին բառերը «յարմարցուած» են. կը հետեւինք ուշադրութեամբ, բարեբախտաբար կրկներգի բաժիններ կան, ուր կրնանք անգամ մը եւս լսել եւ հաստատել, որ ճիշդ լսած ենք: Կայ աւելին. համացանցի միջոցով դարձեալ կը հետեւինք կատարումին, եւ կը հաստատուի այն, ինչ որ վերը յիշուած է:
Համացանցի միջոցով կը ստուգենք երգիչին նոյն երգին կատարումները սփիւռքի մէջ: Սփիւռքի մէջ հարազատ են երգին բառերը, մինչ հայրենիքի մէջ փոխուած են…
Ո՞վ է այս փոփոխութիւն կատարողը (կամ թելադրողը) եւ ի՞նչ իրաւունքով:
Արտօնելի եւ վայել չէ ոեւէ երգիչի այսպիսի փոփոխութիւններ կատարելը:
1 յունուար 2018
Քաղաք Երեւան