«ԱԿՈՒՆՔ»
Երեւանում հայերէնով լոյս է տեսել թուրքագէտ, բանասիրական գիտութիւնների թեկնածու Ռուբեն Մելքոնեանի եւ թուրքագէտ, պատմական գիտութիւնների թեկնածու Մհեր Աբրահամեանի «Օսմանեան կայսրութեան եւ Թուրքիայի Հանրապետութեան բռնի իսլամացման քաղաքականութիւնը հայերի նկատմամբ որպէս ցեղասպանական արարք» գիրքը (Երեւան, ՎՄՎ-պրինտ հրատարակչութիւն, 2015, 238 էջ), որը հրատարակութեան է երաշխաւորել Երեւանի պետական համալսարանի արեւելագիտութեան բաժանմունքի գիտական խորհուրդը:
Աշխատութեան մէջ ներկայացւում է թուրքական պետական քաղաքականութեան կարեւոր բաղադրիչներից մէկը` ոչ իսլամ ազգերի բռնի կրօնափոխութիւնը, որը տարբեր դարերում կիրառուել է նաեւ հայերի նկատմամբ: Սոյն քաղաքականութիւնը յատկապէս աշխուժ է դրսեւորուել Հայոց ցեղասպանութեան տարիներին, ինչի պատճառով բռնի իսլամացման են ենթարկուել հազարաւոր հայեր:
Գրքում բացայայտւում են բռնի կրօնափոխութեան մեթոտներն ու թիրախային խմբերը: Հայերի բռնի իսլամացման խնդիրը դիտարկւում է ցեղասպանութիւն յանցագործութեան միջազգայնօրէն ընդունուած սահմանման պարունակում, համաձայն որի, կրօնափոխութեան միջոցով որեւէ ազգի բռնի ուծացումը ցեղասպանական արարք է: