«Կիւլպէնկեան» Հաստատութեան Հայկական Բաժանմունքին Կոչը

Հայոց Լեզուն Թուայնացման Շրջանին
Բարեփոխել Հայոց Լեզուն`
Տեղեկատուական Արհեստագիտութեան Եւ
Հաղորդակցութեան Նոր Միջոցներով

Յունիս 2015-ին «Գալուստ Կիւլպէնկեան» հիմնարկի հայկական բաժանմունքը եւ «ԹՈՒՄՕ» ստեղծագործական կեդրոնը Երեւանի մէջ միասնաբար կազմակերպեցին աշխատանոց մը` քննարկելու համար հայոց լեզուի հնարաւորութիւններն ու մարտահրաւէրները` տեղեկատուական արհեստագիտութեան խաչմերուկին: Հրաւիրուած 30 փորձագէտները անդրադարձան հայոց լեզուի եւ տեղեկատուական նոր միջոցներու միջեւ բացուած վիհին եւ յստակ առաջարկներ ներկայացուցին, որպէսզի կարելի ըլլայ թուայնացման այս շրջանին զարգացնել մեր մայրենին: Այս հաւաքը նաեւ սկիզբ մը հանդիսացաւ համալսարանական լայն շրջանակներու եւ մասնագէտներու` ճշդելու համար հիմնական ծրագիրներ եւ անոնց գանձատրման աղբիւրները:

Այս աշխատանոցին կը մասնակցէին լեզուագէտներ, արհեստագիտութեան եւ տեղեկատուութեան մասնագէտներ, գրողներ, դասախօսներ, տառատեսակներու ծրագրաւորողներ, հրատարակիչներ, որոնք կը ներկայացնէին թէ՛ արեւմտահայերէնին եւ թէ՛ արեւելահայերէնին, ինչպէս նաեւ արհեստագիտութեան տիրապետող լայն շրջանակ մը: Քննարկումները յանգեցան առանցքային վեց ոլորտներու, որոնց ընդմէջէն կարելի պիտի ըլլայ ուսումնասիրել եւ բարեփոխել մշակուած նախագիծերը: Նշեալ վեց մարզերէն նախապատուութիւն կ՛ընծայուի 2016-ին պիւտճէ յատկացնելու հետեւեալ երեքին.-

1.- Ծրագիր(ներ), որ(ոնք) կը վերաբերի արհեստագիտական բաժնին: Ստեղծել արեւմտահայերէնի ազգային մարմին (corpus national) մը, որուն հիման վրայ կարելի կ՛ըլլայ զարգացնել արեմտահայերէնով համընդհանուր ուղղագրական սրբագրիչ մը, ինչպէս նաեւ` լեզուագիտական այլ սարքեր, որոնք կրնան օգտագործուիլ թուայնացման զանազան հարթակներու վրայ: Ան պէտք է ընդգրկէ բաղադրիչներ, որ(ոնք) կրնան օգտագործուիլ զանազան ծրագիրներու մէջ:

2.- Ծրագիր(ներ), որ(ոնք) կը վերաբերի լեզուական եւ դաստիարակչական մարզին: Զարգացնել զանազան թուայնական եւ ներգործական (interactives) աղբիւրներ, որոնք պիտի ծառայեն արեւմտահայերէն եւ արեւելահայերէն լեզուներու ուսուցման, յատկապէս` սփիւռքի տարածքին:

3.- Ծրագիր(ներ), որ(ոնք) կը վերաբերի բովանդակութեան շերտին: Յառաջացնել բովանդակութեան առցանց գրականութեան միջոց մը եւ խրախուսել զանազան հրատարակութիւններ` արեւելահայերէնով եւ արեւմտահայերէնով:

Յառաջիկային մշակուելիք երկու այլ մարզերը կը վերաբերին պատանիներու համար հայերէն գիրքերու որակեալ թարգմանութեան, ուր գոյութիւն ունեցող եւ գործածուող համակարգերու մէջ անհասանելի են հայկական տառատեսակները,  եւ ուր բացակայ են նաեւ հայկական տիպերու յղացողները:

Իսկ աշխատանոցին մէջ քննարկուող վերջին եւ վեցերորդ մարզը կը վերաբերի կառավարման յանձնախումբի մը ստեղծման, որ պիտի գործէ որպէս համակարգող մարմին` լուծելու համար այն բոլոր հարցերը, որոնք կը վերաբերին հայոց լեզուին եւ թուայնացման համարկումին: Այս խումբը կեանքի պիտի կոչուի թեկնածուներու դիմումները քննարկելէ ետք, որեւէ շահագործումէ խուսափելու համար:

Կը յուսանք, որ այս կոչով հետաքրքրուողները կը ներկայացնեն իրենց առաջարկները վերոնշեալ երեք հիմնախնդիրներուն շուրջ: Հայկական համայնքներու բաժինը կը հայթայթէ սկզբնական հիմնադրամը եւ իր գործընկերներու նիւթական օժանդակութեան կը դիմէ աւելի մեծ ծրագիրներ իրագործելու նպատակով:

Այս նախաձեռնութեան նպատակն է զարգացնել թուայնացման նորարարական արտադրանքը երկարատեւ դրութեամբ, որպէսզի հայ նոր սերունդը, ի մասնաւորի` սփիւռքի մէջ, թուայնացման միջավայրի մէջ հայերէնով ստեղծագործէ եւ աշխատի: