Հայ կաթողիկէ Մեսրոպեան բարձրագոյն վարժարանի աշակերտութիւնը այս տարի եւս խանդավառութեամբ տօնեց Լիբանանի անկախութեան օրը, որուն նուիրուած ձեռնարկները տեղի ունեցան 23 նոյեմբերին:
Մեսրոպեան մանկապարտէզի փոքրիկները կատարեցին տօնին համապատասխան ձեռային աշխատանքներ, տողանցեցին լիբանանեան երգերու կշռոյթներով, ներկայացուցին լիբանանեան մշակոյթին եւ բանակին նուիրուած թատերական փոքր պատկերներ:
Նախակրթարանի եւ երկրորդականի աշակերտները, իրենց հերթին, առանձնաբար տեղի ունեցած հաւաքներու ընթացքին կատարեցին երգեր եւ ընթերցումներ, ներկայացուցին զեկոյցներ` Լիբանանի պատմութեան մասին:
Խօսք առին ուսուցչական կազմի անդամներ Սոնիա Ապեթեանը եւ Էլի Ժաուհարժին, որոնք կոչ ուղղեցին աշակերտներուն` որպէս երկրի ապագայ քաղաքացիներու, տէր կանգնելու հայրենիքին եւ զօրակցելու լիբանանեան բանակին: Անոնք շեշտեցին, որ իւրաքանչիւր լիբանանցի ինքզինք պատասխանատու պէտք է զգայ երկրին նկատմամբ եւ լիուլի կատարէ իր քաղաքացիական պարտականութիւնները:
Մեսրոպեանի տնօրէն Կրեկուար Գալուստ իր խօսքին մէջ ըսաւ, որ կրթութեան եւ գիտութեան ճամբով այսօրուան աշակերտները պիտի կերտեն վաղուան Լիբանանի պայծառ ապագան` կայանալով որպէս ազատ մտքի եւ ազատ խղճի տէր քաղաքացիներ: Ան կոչ ուղղեց աշակերտներուն` սրբօրէն պահպանելու միասնութեան, համերաշխութեան եւ փոխադարձ հանդուրժողականութեան գաղափարները` անոնց հիմքին վրայ ամուր պահելու համար լիբանանեան հայրենիքն ու ընկերութիւնը: