16 նոյեմբեր 2017-ին Ղազախստանի մայրաքաղաք Ասթանայի մէջ գտնուող «Քազկու» համալսարանը Ղազախստանի մէջ Լիբանանի դեսպան Վազգէն Գավլագեանը պարգեւատրեց պատուոյ դոկտորական վկայականով` ներկայութեամբ համալսարանի նախագահին, Ղազախստանի դիւանագիտական մարմնի անդամներուն, դասախօսներուն եւ ուսանողներու:
Համալսարանի նախագահը մասնաւորաբար նշեց, որ վերջին չորս տարիներու ընթացքին Վազգէն Գավլագեանը աշխուժ մասնակցութիւն եւ ներդրում բերած է զանազան առիթներու եւ տարբեր նիւթերով տուած դասախօսութիւններով: Ան իր ներդրումը բերած է նաեւ համալսարանին մէջ ստեղծուած ակադեմական-դիւանագիտական ակումբի աշխատանքները առաջ տանելու: Վ. Գավլագեան աշխուժ եւ դրական մասնակցութիւն բերած է նաեւ օտար քաղաքական դէմքերու, համալսարանին մէջ տեղի ունեցած ելոյթներու ընթացքին հարցադրումներուն, ինչպէս նաեւ Լիբանանի եւ Ղազախստանի յարաբերութիւններու սերտացման նպատակով տարուած աշխատանքներուն: