Թուրքիոյ մէջ «Ազատ լրագրողներու նախաձեռնութիւն»-ը Տիգրանակերտի մէջ մամուլի ասուլիս հրաւիրած է` ներկայացնելով սեպտեմբերին մամուլին դէմ կատարուած իրաւախախտումներու մասին զեկոյցը:
Թրքական «Կերչեքկիւնտեմ» լրատու կայքէջը` մէջբերելով զեկոյցին մէջ հրապարակուած տուեալները, կը նշէ, որ սեպտեմբերին ձերբակալուած է 2 լրագրող,
ազատ արձակուած է 4 հոգի, դատարան ներկայացուած է 53-ը, 4-ը դատապարուած է 7 տարի 8 ամիս բանտարկութեան, 3 լրատու միջոցներու գոյքը հանուած է վաճառքի, 1
հեռատեսիլի կայանի մերժած են գործունէութեան արտօնութիւն տալ:
Հրաւիրուած ասուլիսի ժամանակ նախաձեռնութեան բանբեր Հաքքը Պոլթան նշած է, որ Թուրքիոյ մէջ աւելի շատ բանտարկուած լրագրող կայ, քան` ամբողջ աշխարհի մէջ:
Ըստ անոր տուեալներուն, սեպտեմբերի դրութեամբ բանտերու մէջ կոպտօրէն խախտուած են 176 լրագրողներու իրաւունքները:
Պոլթան քննադատած է երկրի իշխանութիւնները, որոնք ըստ իրեն, Թուրքիոյ մէջ օրէ օր պատերազմ կը հրահրեն եւ կը հեռացնեն խաղաղութիւնը: