Արամ Ա. կաթողիկոս նախորդ շաբաթներուն մօտէն հետեւեցաւ Վենեզուելայի մէջ ստեղծուած անապահով կացութեան եւ յատկապէս` հայ գաղութին դիմագրաւած դժուարութիւններուն: Վեհափառ հայրապետը հետեւեալ տեղեկութիւնները ստացաւ գաղութի պատասխանատուներէն մէկուն կողմէ.
«Աւելի քան տարի մը կ’ընէ, որ Վենեզուելան կը գտնուի ահաւոր դժուարութիւններու առաջ. քաղաքականապէս քայքայուած եւ տնտեսապէս սպառած է ան այլեւս: Կառավարութիւնը կը փորձէ շարունակել իր, այսպէս կոչուած, «կառուցողական» կեցուածքը, սակայն` առաւել բռնութիւն գործադրելով երկրին մէջ, միւս կողմէ` ընդդիմութիւնը ամէնօրեայ դրութեամբ կը կազմակերպէ խաղաղ քայլարշաւներ, որպէսզի ձերբազատի տիրող փտածութենէն: Ամէն օր ժողովուրդը կը պահանջէ կառավարութեան հրաժարումը, հեռացումը, հաշուետուութիւնը` պատիժի հասկացողութեամբ, անմիջապէս նախագահական ընտրութիւններ կատարելը, քաղաքական բանտարկեալներու ազատումը եւ այլն… սակայն, մինչեւ այս վայրկեանս, այս բոլորը ապարդիւն կը մնան, որովհետեւ կառավարութիւնը` նախագահն ու անոր գործակիցները երկիրը ամբողջութեամբ դատարկած ու գողցած են եւ կը շարունակեն նոյն ընթացքը: Կառավարութեան կողքին կայ նաեւ այլ խմբակ մը, որ կառավարութեան կողմէ ստեղծուած է` պարզապէս մարդոց կեանքը վտանգելու, գողնալու եւ մշտական կերպով անապահովութիւն ստեղծելու երկրի ամբողջ տարածքին: Ներքին քաղաքացիական ահաւոր պատերազմի մը ոտնաձայները կը լսուին…
«Խաղաղ քայլարշաւներու ընթացքին դժբախտաբար կառավարութեան ու յատկապէս զինուորականներուն կողմէ տեղի կ’ունենան աննկարագրելի վայրագութիւններ, սպանութիւններ, կրակոցներ, գողութիւններ, ահ ու սարսափ եւ այլ տեսակի անմարդկային գժտութիւններ: Ցայսօր արձանագրուած են աւելի քան 50 սպաննուածներ, 600-700 վիրաւորներ, հարիւրաւոր անյայտ կորածներ, ինչպէս նաեւ` առանց պատճառի բանտարկուողներ: Մէկ խօսքով, երկիրը անկայուն, փխրուն եւ շա՜տ վտանգաւոր փուլի մը մէջ կը գտնուի:
«Ժողովուրդը կը տառապի սովէ, աղքատութենէ, անօթութենէ, դեղերու եւ ուտելիքի չգոյութենէ, անգործութենէ. ամսականները չնչին են, երկիրը օրէ օր անապահով կը դառնայ, ամէնուրեք` գողութիւն, վայրագութիւններ եւ այլ տեսակի անմարդկային արարքներ: Օտար եւ տեղական ընկերութիւններ, դեսպանատուներ, հաստատութիւններ արդէն իսկ փակած են ու կը շարունակեն փակել իրենց գրասենեակները կամ գործարանները, եւ ամէնէն արագ միջոցով կը հեռանան երկրէն` նկատի ունենալով երկրի ծանր, տագնապալի ու մանաւանդ անյոյս վիճակը:
«Երեւակայեցէ՛ք, վեհափա՛ռ տէր, այս բռնակալութեանց ու տագնապահար վիճակին մէջ, զինեալները նոյնիսկ Վենեզուելայի Կաթոլիկ եկեղեցւոյ կարտինալ արքեպիսկոպոսին տունը կողոպտեցին, ինքնաշարժը քարկոծեցին, Աւագ չորեքշաբթի օրով, արարողութեանց ընթացքին Աստուծոյ տունը վերածեցին վայրագութեանց կեդրոնի եւ փորձեցին կարտինալին ու անոր կողքին գտնուող հոգեւոր հայրերուն վնաս հասցնել… Օրէ օր լարուածութիւնը աւելի կը սրի ու կը յամենայ:
«Այս բոլորին կողքին, դժբախտաբար, վենեզուելահայ գաղութը եւս կ’ազդուի եւ արդէն իսկ ազդուած է` իր եկեղեցիով, իր Հայ կեդրոնով ու մանաւանդ իր ժողովուրդով: Այլ խօսքով, գաղութը նօսրացած վիճակի մէջ կը գտնուի. փոքր գաղութ ըլլալով հանդերձ, հայ ընտանիքներու քանակը զգալիօրէն նուազած է` նկատի ունենալով երկրին անապահով ու տագնապալի վիճակը: Մեծ թիւով հայ ընտանիքներ ունենալով ամերիկեան եւ այլ տեսակի եւրոպական վիզաներ` արտագաղթած են ու կը շարունակեն արտագաղթել:
Աւելի՛ն. գաղութը պահող բարերարներէն շատեր իրենց գործատեղիները փակելով, ծախելով, վաճառելով արդէն իսկ հեռացած են երկրէն… Այս ահ ու սարսափի մէջ եկեղեցւոյ կիրակիի սուրբ պատարագները կը շարունակուին»:
Յայտնենք, որ Մեծի Տանն Կիլիկիոյ կաթողիկոսութեան միաբաններէն Ստեփանոս վրդ. Փաշայեանը հոգեւոր տեսուչն է Վենեզուելայի հայ գաղութին:
Հայր սուրբը պատասխանատուութեամբ եւ ծառայական ոգիով, հետեւելով կաթողիկոսի ցուցմունքներուն, կը կատարէ իր հովուական աշխատանքը` միշտ ներկայութիւն դառնալով ժողովուրդին կեանքին մէջ: