Ռիատի մէջ կայացած իսլամական-ամերիկեան վեհաժողովէն բխած յայտարարութիւններն ու ձեռք ձգուած համաձայնութիւնները քանի մը կարեւոր հանգամանքներով հետագայ իրադարձութիւններու հաւանական հունաւորման մասին որոշ նախադրեալներ կը փոխանցեն:
Ուաշինկթըն Ռիատի դերակատարութեան վերասահմանման փորձ կը կատարէ. փաստօրէն Սէուտական Արաբիան տարածաշրջանին մէջ գլխաւոր խաղցողի իր կարգավիճակը սկսած էր զիջիլ այլ տէրութիւններու: Հիմա, հսկայածաւալ պիւտճէ ենթադրող նոր համաձայնութիւններով, բանակը վերազինելու ամերիկեան որոշումը եւ անկէ բխած Ռիատը հակաահաբեկչական կեդրոն դարձնելու համաձայնութիւնը երեւութապէս սէուտակեդրոն տարածաշրջան ձեւաւորելու նախանիշերը կը փոխանցեն:
Միաժամանակ սակայն, Միացեալ Նահանգներու նախագահը պարզ ըսելաձեւով, բայց խառն ուղերձով կը յստակացնէր, որ միջինարեւելեան երկիրներուն փոխարէն Ուաշինկթընը չէ, որ իրենց թշնամիները ճզմելու քաղաքականութիւնը պիտի ստանձնէ: Այստեղ բնականաբար միանշանակ հակառակորդ կամ թշնամի գոյութիւն չունի. Սէուտական Արաբիոյ համար թշնամին Թեհրանն է, Սուրիոյ համար` ՏԱՀԵՇ-ը եւ Անգարան, Անգարային համար` քիւրտերը:
Ուրեմն գետնի վրայ կը թուի, որ հիմնական կտրուկ շրջադարձային փոփոխութիւններու ականատես չ՛ըլլար հանրութիւնը: Օժանդակութիւններ, սահմանափակ գործողութիւններ, այլ ուժերու կողմէ աւելի արմատական գործողութիւններու պարագային զգուշացումներ, համաձայնութիւններ եւ խաղի կանոնները թելադրելու կարգավիճակի պահպանման փորձեր եւ քաոսը վերահսկելու ընդհանուր քաղաքականութեան կիրարկման շարունակութեան փաստեր:
Ռիատակեդրոն տարածաշրջան ձեւաւորելու ամերիկեան ծրագիրը սակայն կրնայ որոշ անհանգստութիւններ յառաջացնել Անգարայի համար: Խնդիրը բնականաբար ոչ թէ Թեհրանի մեկուսացման կը վերաբերի այս պարագային, որքան այդ հակաահաբեկչական համակարգող կեդրոնին համար քրտական զինեալ խմբաւորումները իբրեւ ահաբեկիչ չդասակարգելուն: Փաստօրէն Ուաշինկթընի համար Ռիատի նոր կեդրոնը ահաբեկիչ դասակարգումին մէջ կը ներառէ ՏԱՀԵՇ-ը, Քայիտան, Հըզպալլան ու Համասը:
Անգարան կը գիտակցի հերթական անգամ, որ իրեն համար գլխաւոր ահաբեկիչ նկատուած քիւրտ զինեալ խմբաւորումները ոչ թէ ահաբեկիչ չեն նկատուիր ամերիկեան-սէուտական ճակատին համար, այլ ազդեցիկ անշրջանցելի գործօն ահաբեկչութեան դէմ պայքարին համար:
Հիմա արդիւնքը այն է, որ բոլորը կը խօսին ահաբեկչութեան արմատախլման կարեւորութեան մասին. Իրանն ու Դամասկոսը ահաբեկչութիւն ըսելով կը հասկնան ՏԱՀԵՇ-ն ու Ժապհաթ Նուսրան եւ ՏԱՀԵՇ-ի նմանատիպ խմբաւորումներ, մինչ Սէուտական Արաբիան հիմնականին մէջ Իրանի կողմէ հովանաւորուած Հըզպալլան եւ Համասը, իսկ Անգարան` քիւրտերը: Ուաշինկթընը այս բոլորին մէջ իր դիրքորոշումը կը նոյնացնէ Ռիատին հետ` անհանգստութեան մատնելով Անգարան:
Զուսպ ձեւով այս նոր կեդրոնի աշխատանքներուն կը միանայ նաեւ Պաքուն: Գէթ առայժմ: Անկախ անկէ ուրեմն, որ այստեղ սուր կերպով կ՛երեւին Պաքու-Թեհրան շատ լուրջ հակասութիւններ, յղացքներու ընկալման յստակ տարբերութիւններ կ՛երեւին նաեւ Պաքուի եւ Անգարայի միջեւ ահաբեկչութիւն եւ հակաահաբեկչութիւն յղացքներուն եւ անոնց տակ տեղադրուող դասակարգումներուն միջեւ:
Ամփոփ բանաձեւելու համար արձանագրենք առայժմ, որ հայկական ոսպնեակը այս պարագային կը նկատէ Անգարայի մօտ անհանգստութիւն եւ յստակ տարբերութիւն ահաբեկչութիւն եւ հակաահաբեկչութիւն յղացքներու ձեւաւորման, ընկալման` իր եւ իր դաշնակիցներուն միջեւ. իսկ ուղղակի հակասութիւն Պաքուի եւ Իրանի. տակաւին` հետզհետէ ուրուագծուող Պաքուի եւ Անգարայի միջեւ:
«Ա.»