Այսօրուանից կանխատեսել, թէ ինչ է լինելու 2017 թուին, նշանակում է, որ դուք ՀՀԿ-ին հէնց այսօր արդէն շնորհել էք 50 տոկոսից աւելին: Ես այս մօտեցման հետ համամիտ չեմ: Tert.am-ի հետ զրոյցում ասաց ԱԺ ՀՅԴ խմբակցութեան պատգամաւոր Արծուիկ Մինասեանը: Պատգամաւորը նշեց, որ նրանք, ովքեր ապագայում դիտարկում են նախագահ Սերժ Սարգսեանի վարչապետութեան հարցը, ընդունում են, որ ՀՀԿ-ն շարունակելու է խորհրդարանում մեծամասնութիւն մնալ:
«ԹԵՐԹ».- Օրերս ԱԺ ՀՅԴ Բիւրոյի ներկայացուցիչ Հրանդ Մարգարեանը, անդրադառնալով իշխանութեան հետ քոալիսիոն կազմելու հաւանականութեանը, յայտարարել էր, որ Դաշնակցութիւնը պատասխանատուութիւնից փախչող չէ, բայց ամէն գնով քոալիսիոն կազմելու կողմնակիցը չէ: «Որոշակի պայմաններով կարող ենք ընդունել համագործակցութեան ինչ-որ ձեւ», ասել էր Հրանդ Մարգարեանը: Քննարկե՞լ էք` ի՛նչ պայմանների եւ ի՛նչ համագործակցութեան մասին է խօսքը:
ԱՐԾՈՒԻԿ ՄԻՆԱՍԵԱՆ.- Ո՛չ, չենք քննարկել:
«ԹԵՐԹ».- Մտադրութիւն, ցանկութիւն կա՞յ իշխանութիւնների հետ քոալիսիոն կազմելու:
ԱՐԾՈՒԻԿ ՄԻՆԱՍԵԱՆ.- Մենք մեր ցանկութիւնը, մեր հնարաւորութիւնները կապում ենք փոփոխութիւնների հետ: Եթէ մեր կողմից պաշտպանուող փոփոխութիւնները պէտք է կեանքի կոչուեն, ու դրա համար անհրաժեշտ կը լինի Դաշնակցութեան աջակցութիւնը` անկախ նրանից, թէ ինչպէս դա կը լինի` իշխանութեան մէջ մտնելո՞վ, իշխանութեան հետ համագործակցելո՞վ, քոալիսիոնո՞վ, մենք դրանից չենք խորշում: Մենք սահմանադրական փոփոխութիւնների հարցում ունեցել ենք բաւական սերտ համագործակցութիւն, առանձին հարցերի վերաբերեալ ունեցել ենք միատեսակ մօտեցումներ, եղել են հարցեր, որոնց վերաբերեալ տարբերակուած մօտեցումներ են եղել: Սահմանադրական փոփոխութիւնների բնագիրը կարող է կեանք դառնալ, եթէ շարունակուի այս գործընթացը, այսինքն` աշխատենք միասին, որովհետեւ մեծածաւալ աշխատանքը նոր է սկսւում, այն պահանջում է համատեղ աշխատանք: Բայց սա չի նշանակում, որ համատեղ աշխատանքը անպայման պէտք է տեղի ունենայ միայն քոալիսիոնի միջոցով, ամենեւին ոչ: Մենք մեզ երբեք չենք կաշկանդում վատը, բացասականը արձանագրելու իրաւունքից:
«ԹԵՐԹ».- Նկատի ունէք ստանձնել պատասխանատուութիւն առա՞նց քոալիսիոնին մաս կազմելու:
ԱՐԾՈՒԻԿ ՄԻՆԱՍԵԱՆ.- Մեզ համար պատասխանատուութիւնը ժողովրդի, պետութեան առաջ է, ոչ թէ` այս կամ այն ուժի, կամ անձի: Հետեւաբար, այս տեսանկիւնից, մենք արդէն իսկ ստանձնել ենք պատասխանատուութիւն, երբ սահմանադրական փոփոխութիւնների բնագիրը ընդունելի ենք համարել, ու սահմանադրական փոփոխութիւնների բնագիրը կեանքի կոչելը իւրաքանչիւր դաշնակցականի պատուի հարցն է: Անկախ նրանից` կը լինե՞նք իշխանութեան մէջ, թէ՞ ոչ, մենք պէտք է փորձենք սահմանադրական այս բնագիրը, դրոյթները կեանքի կոչել: Ո՛ր դէպքում աւելի արդիւնաւէտ կը լինի` կապուած է նաեւ մեր դիմացի կողմի պահուածքից:
«ԹԵՐԹ».- Իսկ ի՞նչ է յուշում իշխանութեան պահուածքը: Իրենք ուզո՞ւմ են ՀՅԴ-ի հետ աշխատել:
ԱՐԾՈՒԻԿ ՄԻՆԱՍԵԱՆ.- Այդ ցանկութիւնները պէտք է առաջարկի տեսքով ձեւակերպուեն: Այս պահին ո՛չ մեր կողմից, ո՛չ իրենց կողմից առաջարկութիւն չկայ:
«ԹԵՐԹ».- Պարո՛ն Մինասեան, խորհրդարանական կառավարման համակարգը որակուեց մի կողմից որպէս աւելի ժողովրդավար համակարգ, միւս կողմից` որպէս գործող նախագահի վերարտադրութեան հնարաւորութիւն: Նախագահ Սարգսեանն իր լրագրողների հետ մամուլի ասուլիսի ժամանակ չհերքեց, որ սահմանադրական փոփոխութիւններից յետոյ որեւէ պաշտօն չի զբաղեցնելու: Ստացւում է, որ դուք կողմ էք ժողովրդավարութեանը Սերժ Սարգսեանի վերարտադրութեան հաշուի՞ն, ինչպէ՞ս էք շարունակելու աշխատել իշխանութեան հետ հետագայում, եթէ նախագահն իսկապէս վերարտադրուի:
ԱՐԾՈՒԻԿ ՄԻՆԱՍԵԱՆ.- Նախ ասեմ, որ բացարձակ այդպէս չէ, որ խորհրդարանական կառավարման համակարգն ամենաժողովրդավարն է: Մենք ասել ենք, որ այն իրավիճակում, այն մշակութային արժէքներ կրող հասարակութիւնում, ինչպիսին Հայաստանն է, ամենաարդիւնաւէտ կառավարումը խորհրդարանականն է:
Ինչ վերաբերում է այս կամ այն անձի հետագայ պաշտօնին, ապա մենք այդպիսի ո՛չ ցանկութիւն, ո՛չ մտադրութիւն, ո՛չ կանխատեսում չենք կարող ունենալ: Ամէն անձ ինքն է իր ցանկութիւնների տէրը: Բայց դա չի նշանակում, որ իր մտածածը, իր ցանկութիւնը բացարձակ ճշմարտութիւն է բոլորի համար, կամ անպայմանօրէն իրականացուող դրսեւորում պէտք է լինի: Ակնյայտ է, որ այն փոփոխութիւնները, որոնք կան նոր սահմանադրութեան մէջ, պահանջում են մեծածաւալ աշխատանք, որտեղ պարտադիր պէտք է ներգրաւուեն քաղաքական բոլոր ուժերը: Նրանք, ովքեր իրենց մի կողմ դնեն այս աշխատանքից, նշանակում է, որ չեն ցանկանում, որ երկրում իրական, համակարգային փոփոխութիւններ լինեն:
Տեսէք, ասում էք, որ Սերժ Սարգսեանը չհերքեց® Ինչ է, ամէն անգամ պէտք է մարդը երդո՞ւմ ուտի, որ չի անելու մի բան, որի մասին արդէն ասել էր, որ չի անելու: Իսկ ի՞նչ էր ձեզ տալու, որ նորից ասէր` այո: Ինչ է, դադարելո՞ւ էին այս խօսակցութիւնները: Ինքն այն ժամանակ ասաց` ցանկութիւն չունեն, բայց խօսակցութիւնները չդադարեցին: Եւ մի կարեւոր հանգամանք. այսօրուանից կանխատեսել, թէ ի՛նչ է լինելու 2017թ.ին, նշանակում է, որ դուք ՀՀԿ-ին հէնց այսօր արդէն շնորհել էք 50 տոկոսից աւելին: Ես այս մօտեցման հետ համամիտ չեմ: Նրանք, ովքեր նախագահ Սարգսեանի վարչապետութեան հարցը դիտարկում են, դիտարկում են փաստօրէն այն կանխավարկածից, որ ՀՀԿ-ն շարունակելու է խորհրդարանում մեծամասնութիւն մնալ:
Այսինքն դուք ընդունում էք սա իրողութիւնը, ժողովրդին ուղարկում էք անյուսութեան գիրկը, որ այս երկրում հնարաւոր չէ իշխանութեան փոփոխութիւն: Եթէ անձը գալիս է իշխանութեան ազատ ընտրութիւնների միջոցով, նրան մի՛ վարկաբեկէք, թիրախ մի՛ դարձրէք, նրան թիւ մէկ թշնամի մի՛ դարձրէք ու յարձակում գործէք: Ձեր գլխաւոր թիրախը, երբ այս սահմանադրական փոփոխութիւններն իրողութիւն են, այլեւս ընտրական համակարգը պէտք է լինի:
«ԹԵՐԹ».- Խնդիրը նրանում է, որ ընդդիմութիւնը չի համարում Սերժ Սարգսեանին ազատ, արդար ընտրութիւններով ընտրուած, իսկ սահմանադրական հանրաքուէն գնահատում է որպէս կեղծուած, որին մասնակցել են արջի ծառայութիւններ մատուցողները:
ԱՐԾՈՒԻԿ ՄԻՆԱՍԵԱՆ.- Արջի ծառայութիւններ չէ, ես առանձին դէպքերում կարող եմ համեմատել նրանց այն կթան կովերին, ովքեր կաթը տալիս են, յետոյ կաթով դոյլը ոտքով թափում են: Եթէ ի վիճակի չես ապահովել քո կողմնակիցների այս կամ այն քուէարկութեան կողմնորոշումը, ի վիճակի չես համոզել մարդկանց` քո հեղինակութեան հաշուին, նշանակում է, որ անիմաստ է քո ծառայութիւնը: Իսկ ընտրական այսօրուան համակարգը խրախուսում է հէնց այս տեսակը: Խնդիրը համակարգի մէջ է` անկախ նրանից, թէ ո՛վ կը լինի իշխանութիւն: Ձեր կարծիքով, այսքան ընտրութիւնները, որ եղել են, անցել են ազա՞տ, արդա՞ր, թափանցի՞կ միջավայրում: Ընտրութիւնների ժամանակ քանի՞ անձ է փոխուել, բազմաթիւ, բոլորին մեղադրել են, բայց ոչ մէկը չի ասում, թէ համակարգն է մեղաւորը: 1991թ.ին ազատ, արդար ընտրութիւններով եկաւ նախագահը, յետոյ նոյն մարդն էր, Գերագոյն խորհրդի նախագահ էր, դարձաւ երկրի նախագահ: Ինչո՞ւ 95-ին, 96-ին այլանդակուեց: Նոյն մարդն էր: Ազատ ընտրութիւններով էր եկել, բա ինչո՞ւ արատաւորուեց: Այսօր «այո»-ն ծնուել է, շատ ծանր ծնունդ է եղել, նոյնիսկ ծնուելու պահին արդէն հիւանդոտ է, հիմա պէտք է առողջացնենք:
«ԹԵՐԹ».- Ի՞նչ առումով է հիւանդոտ:
ԱՐԾՈՒԻԿ ՄԻՆԱՍԵԱՆ.- Կասկածամտութեան, հանրային անվստահութեան միջավայրի պատճառով, որը ձեւաւորուել է: Ինչքան էլ ես համոզուած լինեմ, որ «այո»-ն անցել է, հասարակութեան մեծամասնութեանն իմ համոզմունքը դեռեւս բաւարար չէ, չնայած, ես հաշուարկել եմ, որ հնարաւոր չէր, որ «այո»-ն չանցնէր: