Ձախէն աջ` փրոֆ. Պենետիքթ Հարզլ, Քէյթ Նահապետեան եւ Ռուբէն Մելիքեան
Արդարութեան եւ մարդկային իրաւանց հայկական իրաւական կեդրոնը կը տեղեկացնէ, որ Միացեալ Նահանգներ այցելած Արցախի մարդկային իրաւունքներու պաշտպան Ռուբէն Մելիքեանը, քաղաքական հանդիպումներուն կողքին, առիթը ունեցած է ելոյթ մը ունենալու «Ճոնզ Հոփքինզ» համալսարանի յառաջացեալ միջազգային ուսմանց բաժանմունքին մէջ` լուսարձակի տակ առնելով անցեալ տարուան ապրիլեան քառօրեայ պատերազմին ընթացքին Արցախի ժողովուրդին եւ զինուորներուն դէմ Ազրպէյճանի զինուած ուժերուն կատարած վայրագութիւնները:
Ներկայացումը կը վայելէր նոյն համալսարանի Անդրատլանտեան յարաբերութեանց կեդրոնին հովանաւորութիւնը: Մարտ 15-ին կայացած ներկայացումը համակարգած է Անդրատլանտեան յարաբերութեանց կեդրոնէն փրոֆ. Պենետիքթ Հարզլ` խօսելով միջազգային ճանաչում չապահոված պետութեանց տագնապները լուծելու դժուարութիւններուն մասին:
Ապա բեմ բարձրացած է Ռուբէն Մելիքեան, որ նախ բացատրութիւններ տուած է 2008-ին հաստատուած` Արցախի մարդկային իրաւունքներու պաշտպանի պաշտօնի պատասխանատուութեանց եւ լիազօրութիւններուն մասին, յիշեցնելով, որ ինք «հայոց իրաւունքներու պաշտպան» չէ՛, այլ` «մարդկային իրաւանց պաշտպան»:
Ապա ան մանրամասնութիւն տուած է ապրիլեան քառօրեայ պատերազմին ընթացքին Ազրպէյճանի մարդկային իրաւանց ոտնակոխումներուն եւ անկէ ետք շարունակուող զինադադարի խախտումներուն ու շարունակական սպառնալիքներուն ունեցած հետեւանքներուն մասին: Մելիքեան խօսած է ազրպէյճանցի պատերազմական գերիի մը հետ իր հանդիպումին մասին եւ` յիշեցուցած, թէ ազրպէյճանական ուժերուն կողմէ գերի բռնուած 28 զինուորներուն եւ երեք քաղաքայիններուն 90 տոկոսին մարդկային իրաւունքները տարբեր մակարդակի ոտնակոխումներու ենթարկուած են, իսկ անոնց մէկ մասը սպաննուած է գերութեան մէջ:
Արցախի մարդկային իրաւունքներու պաշտպանը նաեւ ցաւ յայտնած է, որ Ազրպէյճանի մարդկային իրաւանց ոտնակոխումները բաւարար կերպով չեն դատապարտուած միջազգային համայնքին կողմէ, ազդարարելով, որ` «նման ոտնակոխումներ պիտի քաջալերուին, եթէ անոնք անպատիժ մնան»:
Այս գծով, Արդարութեան եւ մարդկային իրաւանց հայկական իրաւական կեդրոնի գործադիր վարիչ Քէյթ Նահապետեան կը յայտնէ, որ կեդրոնը նամակներ յղած է իրաւապաշտպան Միջազգային ներում (Amnesty International) եւ Մարդկային իրաւանց դէտ (Human Rights Watch) կազմակերպութիւններուն, որ իրենց տարեկան տեղեկագիրներուն մէջ մանրամասն տեղեկութիւններ արձանագրեն ազրպէյճանական պատերազմական ոճիրներուն մասին: Արցախի մարդկային իրաւունքներու պաշտպան Ռուբէն Մելիքեանի սոյն ելոյթը կարելի է դիտել` այցելելով www.youtube.com/watch?v=FBO1vbtp720&t=134s կայքէջը: