2017թ. մարտ 22-ին նորագոյն արհեստագիտութեան ուսուցման «Տը լիթըլ էնճընիր» կազմակերպութեան ներկայացուցիչը այցելեց Հայ կաթողիկէ Մեսրոպեան բարձրագոյն վարժարան եւ վկայականներ յանձնեց Մեսրոպեանի այն աշակերտներուն, որոնք յաջողութեամբ աւարտած էին կազմակերպութեան Robotics-ի դասընթացքին առաջին հանգրուանը:
Մեսրոպեանը նշեալ կազմակերպութեան հետ սկսած էր գործակցիլ այս տարեսկիզբէն` քաջալերելու համար աշակերտները, որ ծանօթանան մարդամեքենաներու կազմութեան, եռաչափ տպագրութեան (3D printing) եւ համակարգչային ծրագրաւորման (Coding) գիտութիւններուն: Նոյն ծրագրով աշակերտներուն առիթ կը տրուէր իրականացնելու զանազան գիտափորձեր` ուսողութեան ճարտարագիտութեան, վերարտադրուող ուժանիւթի, ելեկտրոնային եւ այլ ուղղութիւններով:
Այս առիթով կայացած աշակերտական հաւաքին Մեսրոպեանի տնօրէն Կրեկուար Գալուստ շնորհաւորեց աշակերտները` անոնց յաջողութեան համար, յորդորեց բոլորը` հետաքրքրուիլ նորագոյն արհեստագիտական ձեռքբերումներով, որպէսզի առաւել պատրաստ ըլլան ապագայի ուսման եւ աշխատանքի պայմաններուն:
ՏԵՂԵԿԱՏՈՒԱԿԱՆ ԳՐԱՍԵՆԵԱԿ
ՀԱՅ ԿԱԹՈՂԻԿԷ ՄԵՍՐՈՊԵԱՆ ԲԱՐՁՐԱԳՈՅՆ ՎԱՐԺԱՐԱՆԻ