Եւրոպայի տարածքին ազրպէյճանական քարոզչական մեքենան փետրուարին լայնածաւալ աշխատանքի սկսած է` Խոջալուի դէպքը հայկական կողմին վերագրելով եւ փորձելով հանրութեան ուղղութիւնը շեղել:
25 փետրուար 2017-ի յետմիջօրէին Շուէտի ՀՅ Դաշնակցութեան 10 երիտասարդներ ձախողեցուցին ազրպէյճանական դեսպանատան կազմակերպած հաւաքը` Խոջալուի մէջ եղածը ջարդ կոչելու նպատակով կազմակերպուած:
Հաւաքը տեղի ունեցաւ Շուէտի խորհրդարանին դիմաց, ուր Ազրպէյճանի դեսպանատունը դատապարտումի եւ ժխտողական պաստառներով ներկայացած էր:
Սակայն Շուէտի Երիտասարդաց միութիւնը դէմ յանդիման կանգնեցաւ զանազան կարգախօսով պաստառներ բարձրացնելով եւ ներկաներուն ցրուելով թռուցիկներ անգլերէն եւ շուէտերէն լեզուներով` ձախողեցնելով ազրպէյճանական հակահայ առաքելութիւնը, նաեւ բացատրելով անցորդներուն, թէ իսկական զոհերը հայերն են: