ՐԱՖՖԻ ԵՍԱՅԵԱՆ
Քառասուն օրեր առաջ մեզմէ առյաւէտ բաժնուեցաւ Վարուժան Թորիկեանը: Ան եղբայրը եղած է ՀՄԸՄ Ժունիէի մասնաճիւղի հիմնադիր անդամներէն: Եղած է սկաուտ, մարզիկ, վարչութեան անդամ, ատենապետ:
Տարիներու որպէս վաստակաւոր միութենական, ան միշտ մասնակցած է մասնաճիւղի վերելքին` իր անձը նուիրելով իր սիրելի միութեան:
Միշտ եղած է պատնէշի վրայ, պատրաստ` օգտակար ըլլալու: Վերջերս, առ ի գնահատանք իր հարուստ վաստակին ՀՄԸՄ-ի Շրջանային վարչութիւնը զայն պատուեց Ծառայութեան շքանշանով: Վարուժան Թորիկեան մասնակից դարձած է նաեւ Ժունիէի ազգային-հասարակական կեանքին` որպէս թաղական ծառայելով եկեղեցւոյ:
Ան եղաւ օրինակելի հայր, իր կեանքը նուիրելով իր ընտանիքին, մանաւանդ իր զաւակներուն հայեցի դաստիարակութեան: Եղբ. Վարուժանի յիշատակը միշտ վառ պիտի մնայ իր միութենական քոյրերուն-եղբայրներուն, ինչպէս նաեւ բոլոր զինք ճանչցողներու սիրտերուն մէջ:
Սիրելի՛ եղբ. Վարուժ, վարձքդ կատար, հողը թեթեւ գայ: