ՀՅԴ Բիւրոյի ներկայացուցիչ Հրանդ Մարգարեանին Մեծայա՛րգ պարոն Մարգարեան, ՀՅԴ կուսակցութեան պատուարժան անդամներ, Ուղեկից կառոյցների յարգարժան ղեկավարներ, Լրացաւ ՀՅԴ կուսակցութեան հիմնադրման 125-ամեայ յոբելեանը, որը իւրաքանչիւրիս հնարաւորութիւն է ընձեռում մէկ անգամ եւս անդրադառնալու կուսակցութեան անցած ուղուն, հայրենանուէր գործունէութեանը եւ Հայ դատի արդարացի լուծմանն ուղղուած նրա ջանքերին:
Հայաստանի Հանրապետութեան սփիւռքի նախարարութեան եւ անձամբ իմ անունից շնորհաւորում եմ ՀՅԴ բոլոր անդամներին այս փառաւոր յոբելեանի առթիւ:
Կուսակցութեան անցած ճանապարհը լի է եղել բարդութիւններով, խոչընդոտներով ու յաջողութիւններով: Այն կարողացել է համախմբել ազգային յեղափոխական ուժերը` դառնալով մեր ազգային-ազատագրական պայքարի դրօշակակիրը:
ՀՅԴ-ն անցեալի, ներկայի եւ ապագայի կուսակցութիւն է: Անուրանալի է նրա դերը Հայաստանի առաջին Հանրապետութեան կերտման, աշխարհասփիւռ հայութեան ազգապահպանման եւ Հայ դատի արդար լուծման գործում: Կուսակցութեան հետեւողական պայքարի արդիւնքում վերականգնուեց դարերով կորսուած պետութիւնը` ստեղծելով առաջին Հանրապետութիւնը:
Սփիւռքեան իր բազմաթիւ տեղական մարմինների եւ քոյր կառոյցների ջանքերով 125 տարի ի վեր սփիւռքի հայկական համայնքներում այն իրականացնում է հայ ինքնութեան պահպանման եւ համազգային խնդիրների լուծմանն ուղղուած շնորհակալ աշխատանքներ:
Հայաստանի Հանրապետութեան անկախութեան հռչակումից յետոյ վերահաստատուելով հայրենիքում` ՀՅԴ-ն շարունակում է իր կարեւորագոյն դերակատարութիւնն ունենալ հայկական երկու հանրապետութիւնների կայացման եւ առաջընթացի գործում` պահպանելով իր բնորոշ դիմագիծն ու կեցուածքը երկրի թէ՛ ներքին, թէ՛ արտաքին քաղաքականութեանն առնչուող հարցերում:
Այսօր էլ ՀՅԴ-ն իր բեղուն գործունէութեամբ ու քաղաքական ծրագրերով մեծ դերակատարում ունի մեր երկրի քաղաքական խճանկարում. պետութեան եւ միւս կուսակցութիւնների հետ ձեռք ձեռքի տուած` իրականութիւն դարձան սահմանադրական բարեփոխումները, որոնք, անշուշտ, կը նպաստեն` խորացնելու ժողովրդավարութիւնը, պաշտպանելու մարդու իրաւունքներն ու ազատութիւնները, նպաստելու հզօր Հայաստանի կերտմանը:
Հայոց ցեղասպանութեան 100-րդ տարելիցի այս տարում միաւորուեց ողջ ազգը, բռունցքուեց եւ կարողացաւ մի նոր հանգրուանի հասցնել Հայոց ցեղասպանութեան ճանաչման, դատապարտման եւ հետեւանքների վերացման հիմնահարցը: Ակնառու էր կուսակցութեան գործունէութիւնը Հայ դատն առաջ տանելու, աշխարհի տարբեր անկիւններում նպատակային, կազմակերպուած բազմաբնոյթ միջոցառումներ նախաձեռնելու ու անցկացնելու ուղղութեամբ:
Ինչպէս շնորհակալ չլինել Հայ դատի մեր գրասենեակներին, մեր նուիրեալ հայորդիներին, որոնք ջանք չեն խնայում հայոց պահանջատիրութիւնն առաջ տանելու հարցում: Եւ, վստահ եմ, որ մենք յաղթելու ենք, քանի որ մեր յետեւից գալիս է աշխուժ, հզօր, կազմակերպուած, գրագէտ ու մրցունակ հայ երիտասարդութիւնը, որը շարունակելու է աւագ սերնդի` յանուն արդարութեան ու ճշմարտութեան մղուող պայքարը, եւ առաւել համախմբուած շարունակելու ենք 100+1, 100+2® պայքարը:
Հայաստանի Հանրապետութեան սփիւռքի նախարարութիւնը մշտապէս համագործակցում է ՀՅԴ բոլոր կառոյցների հետ եւ զգում նրանց աջակցութիւնը Հայաստան-սփիւռք գործակցութեան զարգացմանն ուղղուած իր նախաձեռնութիւններում:
Սիրելի՛ բարեկամներ, ուրախ եմ, որ դուք կաք, ուրախ եմ, որ դուք ձեր քաղաքական ամուր ողնահարով պահում եւ պահպանում էք ձեր էութիւնը, ձեր գործունէութեամբ օգնում` դիմագրաւելու մեր ազգի առջեւ յառնուած մարտահրաւէրներին:
Ուզում եմ կրկին շնորհաւորել ձեզ այս նշանակալի յոբելեանի առթիւ եւ վստահութիւն յայտնել, որ համատեղ աշխատանքով էլ աւելի կ՛ամրապնդենք Հայաստան-սփիւռք գործակցութիւնը:
Թող ձեր երազանքները, որոնք հայ ժողովրդի երազանքներն են, ամբողջութեամբ իրականութիւն դառնան:
Յարգանքով`
ՀՐԱՆՈՒՇ ՅԱԿՈԲԵԱՆ
11/12/2015