2012-ին, Հալէպի պատերազմական վիճակի վատթարացումով, Նոր Գիւղի մէջ գտնուող Ազգային Քարէն Եփփէ Ճեմարանի թաղամասը շարունակական հրթիռակոծումներու թիրախ դարձաւ:
Ճեմարանականները ստիպուած հեռացան իրենց վարժարանէն եւ ուսումնական իրենց կեանքը շարունակեցին համեմատաբար աւելի ապահով շրջանի` Սուլէյմանիէի մէջ գտնուող Ազգ. Կիւլպէնկեան վարժարանին մէջ:
Հալէպի խաղաղութեան վերահաստատումով Ճեմարանի թաղամասը ապահով դարձաւ, եւ 5 տարի շարունակ Ճեմարանի կարօտով ապրող ճեմարանականները 31 դեկտեմբերի առաւօտուն, Ս. Գրիգոր Լուսաւորիչ եկեղեցւոյ մէջ Ս. հաղորդութիւն ստանալէ ետք, այցելեցին Ճեմարան:
Անոնք մաքրեցին պատերազմին թողած հետքերը, բարեկարգեցին իրենց ամրոցը ու կարօտակէզ իրենց հոգիները մխիթարուեցան Ազգ. Քարէն Եփփէ Ճեմարան վերադառնալու ուրախութեամբ:
Աշակերտութեան ընկերակցեցան Բերիոյ հայոց թեմի առաջնորդ Շահան արք. Սարգիսեան, Ազգ. վարչութեան անդամները, Ճեմարանի Խնամակալութիւնը, տնօրէնութիւնն ու ուսուցիչ-դաստիարակները:
Հինգ տարուան տարագրութենէն ետք, ճեմարանականները ցնծութեամբ շրջեցան իրենց վարժարանին մէջ, այցելեցին դասարանները ու մաքրեցին շրջափակը` մասնակցելու հայակերտ այս ամրոցի բարեկարգման աշխատանքներուն: Կարգ մը սերունդներ երկրորդականի իրենց ուսման անցնող հինգ տարիներու ընթացքին հնարաւորութիւն չէին ունեցած յաճախելու Ճեմարան: Անոնց երազը իրականութիւն դարձաւ:
Աշակերտները այցելեցին իրենց երկրորդ տունը` պատերազմի մրրիկներուն դէմ կանգուն մնացած Ազգ. Քարէն Եփփէ ճեմարան` ուսումնական յառաջիկայ կիսամեակը Ճեմարանի երդիքին տակ շարունակելու յոյսով:
