Յիսուս Քրիստոսի ծնունդը սիրոյ ծնունդն է, փրկութեան ծնունդն է, եւ ի վերջոյ անիկա այն բոլորին ծնունդն է, որ կ՛ազատագրէ մարդս սատանայի ստրկական կապանքներէն եւ հաշտութեան հող կը պատրաստէ մարդուն եւ Արարիչին միջեւ` զայն ուղղելու դէպի աստուածային փրկարար շնորհ:
Քրիստոսի ծնունդով մարդը վերստին ծնաւ եւ անոր առջեւ ադամական մեղքին իբրեւ հետեւանք փակուած դրախտի դռները կրկին անգամ բացուեցան:
25 դեկտեմբերին Տիրամայր Զմմառու վանքը մեծ շուքով կը նշէ Յիսուս Քրիստոսի ծննդեան տօնը:
Կիրակի առաւօտեան ժամը 10:30-ին մայրավանքի վերափոխման Ս. Կուսին եկեղեցւոյ մէջ Ս. պատարագը մատուցեց վանքին մեծաւոր հայր` Գաբրիէլ Թ. Ծ. վրդ. Մուրատեան:
Խորանին սպասաւորութիւնը կատարեցին Երանելի Իգնատիոս Մալոյեան դպրեվանքի ժառանգաւորներն ու Ս. Միքայէլ ընծայարանի նորընծաները:
Հանդիսաւոր արարողութեան քարոզին մէջ Մեծաւոր հայրը ամենայն մանրամասնութեամբ եւ խորազննին ձեւով ներկայացուց Յիսուս Քրիստոսի ծննդեան խորհուրդը եւ այսօրուան համայն մարդկութեան ուղղուած պատգամը` որպէս սիրոյ եւ համերաշխութեան կոչ:
Յաւարտ Ս. պատարագին հաւատացեալները մեծաւոր հօր եւ ժառանգաւորներուն ուղեկցութեամբ յառաջացան դէպի մայրավանքի դահլիճը. նախ տեղի ունեցաւ տնօրհնէքի արարողութիւն. ապա մեծաւոր հայրը, վանքի վարչութեան հետ, ընդունեցին շնորհաւորութիւնները:
Քրիստոս ծնաւ եւ յայտնեցաւ
Ձեզի մեզի մեծ աւետիս
Զմմառեան ուխտէն ժառանգաւոր`
ԿԱՐՕ ՔԼԸՆՃԵԱՆ