Լիբանանի քաղաքական կեանքին մէջ արձանագրուած յուսատու ծանօթ զարգացումներու առթած դրական մթնոլորտը իր արտայայտութիւնը գտաւ Հայ կաթողիկէ Մեսրոպեան բարձրագոյն վարժարանի այս տարուան անկախութեան օրուան տօնակատարութեան մէջ, որ կայացաւ ուրբաթ, 18 նոյեմբերին:
Աշակերտները հանդիսութեան մասնակցեցան մեծ խանդավառութեամբ` բեմէն թէ սրահէն, մեծ ոգեւորութիւն ստանալով նաեւ օրուան գլխաւոր պատգամէն, զոր փոխանցեց յատուկ այս առիթով վարժարան հրաւիրուած զօրավար Ժորժ Նատէր` Լիբանանեան բանակի յատուկ ուժերու հանգստեան կոչուած նախկին հրամանատարը:
Իր պատգամին մէջ զօր. Նատէր կոչ ուղղեց աշակերտներուն, որպէս երկրի ապագայ քաղաքացիներու, տէր կանգնելու հայրենիքին եւ ժողովուրդին շահերուն եւ վստահելու զօրակցելու լիբանանեան բանակին` որպէս երկրի անկախութեան ամէնէն կայուն երաշխաւորը: Ան շեշտեց, որ իւրաքանչիւր լիբանանցի ինքզինք պատասխանատու պէտք է զգայ երկրին նկատմամբ եւ չզլանայ օրէնքով նախատեսուած իր քաղաքացիական պարտականութիւնները կատարել յանուն աւելի արդար եւ ապահով երկրի մը: Զօր. Նատէր ըսաւ, որ Լիբանան պարտաւոր է գործադրել իրապէս անկախ եւ ազգային քաղաքականութիւն եւ վերջ դնէ արտաքին ուժերու թելադրանքներով եղած գործողութիւններուն:
Մեսրոպեանի տնօրէն Կրէկուար Գալուստ իր խօսքին մէջ ըսաւ, որ կրթութեան եւ գիտութեան ճամբով այսօրուան աշակերտները պիտի կերտեն վաղուան Լիբանանի պայծառ ապագան, կայանալով որպէս ազատ մտքի եւ ազատ խղճի տէր քաղաքացիներ: Ան կոչ ուղղեց աշակերտներուն` սրբօրէն պահպանելու միասնութեան, համերաշխութեան եւ փոխադարձ հանդուրժողականութեան գաղափարները, անոնց հիման վրայ ամուր պահելու համար լիբանանեան հայրենիքն ու ընկերութիւնը:
Այս առիթով Կրէկուար Գալուստ վարժարանին կողմէ գնահատանքի յուշանուէր մը յանձնեց զօր. Նատէրին:
Մեսրոպեանի արաբերէնի ուսուցիչ, հանդիսութեան կազմակերպիչներէն Ռուլա Սարգիս իր հերթին ողջունեց լիբանանեան բանակն ու ոգեկոչեց անոր նահատակներուն յիշատակը: Այս առիթով ան յիշատակեց նաեւ Արցախի մէջ ինկած հայ զինուորները, որոնք նոյնպէս իրենց կեանքը նուիրաբերեցին յանուն հայրենի հողի ազատագրութեան եւ պաշտպանութեան:
Հանդիսութեան գեղարուեստական բաժինով, Մեսրոպեանի «Ծիծեռնակ» մեծերու երգչախումբը կատարեց երկու երգեր` խմբավարութեամբ Մանուէլ Քէշիշեանի, տարբեր դասարաններու աշակերտներ ներկայացուցին լիբանանեան աւանդական տապքէ պարեր, երկրորդականի խումբ մը աշակերտներ կատարեցին լիբանանեան աւանդական երգասացութեան կտոր մը` զաժալ, Ե. եւ Զ. դասարաններու աշակերտներ արաբերէն լեզուով ներկայացուցին թատերական պատկեր մը` «Ինչ կը պահանջենք մեր կառավարութենէն 2016-ին» վերնագիրով, Ա., Բ. եւ Գ. դասարաններու աշակերտներ ներկայացուցին Լիբանանի համառօտ պատմութիւնը` լուսանկարաշարի մը ընկերակցութեամբ, աշակերտուհիներ Մարիա Եմէնեան (դաշնակ) եւ Արմիկ Հեքիմեան (քլարինեթ) գեղեցկօրէն նուագեցին երաժշտական երկու կտորներ: Հանդիսութիւնը եզրափակուեցաւ Լիբանանի միասնութեան նուիրուած «Ուան Լեպընոն» երգով, զոր կատարեցին կրտսեր եւ աւագ դասարաններու աշակերտներ: Աշակերտութեան խօսքը փոխանցեց Վանեսսա Հատատ, օրուան հանդիսավարն էր Մեսրոպեանի աշակերտ Քրիսթէլ Գոշոյեան: