Քառասուն օրեր առաջ, արկածի իբրեւ հետեւանք մահացաւ վերջին երկու տարիներուն «Այնճարի ոռոգման ջուրի յանձնախումբ»-ի ջուրի մատակարարման մեքենաներու պատասխանատու, հալէպահայ, ՀՅ Դաշնակցութեան համակիր Յակոբ Թիւթիւնճեանը: Բոլորովին անակնկալ այս արկածը ցնցեց Այնճարի հայութիւնը:
Արդարեւ, մահացողը Հալէպէն ընտանեօք Այնճար ապաստան գտած հայ ընտանիքի հայր էր, որ պատերազմէն խոյս տալով Այնճարը ընտրած էր իբրեւ ապահով հայկական միջավայր, իր տիկնոջ` Մարալ Սարգիսեան-Թիւթիւնճեանին եւ երկու տղոց` Գարեգինին եւ Կարոյին համար:
Այնճար փոխադրուելով, ան ճակտի քրտինքով ուզեց հոգալ իր ընտանիքին կարիքները, եւ աշխատանքի սկսաւ իբրեւ վարպետ ինքնաշարժ նորոգող:
Շատ հարազատ զգաց Այնճարն ու այնճարցիները եւ շուտով մաս կազմեց Այնճարի ընկերային կեանքին:
Կամաւոր կերպով մասնակցեցաւ Այնճարի պահակութեան, երբ անհրաժեշտ նկատուեցաւ գիւղի ապահովութեան համար պահակութեան դրութիւն հաստատել:
Յակոբը նաեւ լաւ մարզիկ էր եւ նոյնիսկ Հալէպի մէջ ծանրաբարձութեան մարզիչ եղած էր ժամանակին:
Վերջին երկու տարիներուն ան պատասխանատուն էր «Այնճարի ոռոգման ջուրի յանձնախումբ»-ի մեքենաներուն, աշխատանք մը, որ կատարեց բծախնդրօրէն եւ շատ պարտաճանաչ կերպով` բոլորին կողմէ գնահատուելով: Հաւանաբար այդ էր պատճառը, որ անոր յուղարկաւորութեան մեծ թիւով հայրենակիցներ եկած էին յարգելու անոր յիշատակը:
Արդէն անցած են քառասուն օրեր այդ դժբախտ պատահարէն, սակայն իր մօտիկները կը շարունակեն փնտռել զինք…
Սիրելի՛ Յակոբ, դուն պիտի մնաս մեր սիրելի ընկերը եւ յիշատակդ պիտի մնայ մեր մէջ` իբրեւ ազնիւ, ծառայասէր եւ հայրենասէր հայորդիի:
Կը փոխանցենք մեր ցաւակցութիւնները կողակիցիդ եւ զաւակներուդ` մաղթելով, որ Աստուած լոյսերու մէջ պահէ հոգիդ:
Հողը թեթեւ գայ վրադ:
ԸՆԿԵՐԴ` ՓՈԼ ՀԵՐԿԵԼԵԱՆ