Հայ կաթողիկէ Մեսրոպեան բարձրագոյն վարժարանը այս տարեշրջանին կը սկսի գործադրել աշակերտներու գիտական զարգացման ծրագիր մը` հանրայայտ The Little Engineer կազմակերպութեան հետ գործակցաբար:
Սոյն ծրագրին մասնակից աշակերտները պիտի սորվին օգտագործել արհեստագիտական նորագոյն միջոցներ եւ անոնցմով պիտի պատրաստեն տարբեր արտադրութիւններ: Անոնք պիտի կազմեն մարդամեքենաներ, պիտի կատարեն եռաչափ տպագրութիւն (3D printing), պիտի սորվին համակարգչային ծրագրաւորման լեզուներ եւ պիտի իրականացնեն զանազան այլ գիտափորձեր` ուսողութեան, ճարտարագիտութեան, վերարտադրուող ուժանիւթի, ելեկտրոնային եւ այլ ուղղութիւններով:
Ծրագիրը առայժմ ներառուած է Մեսրոպեանի շաբաթավերջի արտադասարանային աշխատանքներուն մէջ, որոնց աշակերտները կրնան մասնակցիլ տարիքային չորս տարբեր խումբերու մէջ` 6-18 տարեկան: Հետագային նախատեսուած է վարժարանին մէջ հաստատել աշակերտական առանձին ակումբ մը, որուն անդամները պիտի հետեւին դասընթացքներու` The Little Engineer կազմակերպութեան մասնագէտներու հսկողութեան տակ: Նոյնպէս նախատեսուած է գիտելիքներու կարեւորագոյն բաղադրամասերը ներառել կրթական ընդհանուր ծրագրին մէջ:
10 հոկտեմբեր 2016-ին The Little Engineer կազմակերպութեան մասնագէտները այցելեցին Մեսրոպեան վարժարան եւ հանդիպում ունենալով աշակերտներուն հետ` անոնց ներկայացուցին այն տարբեր աշխատանքները, որոնք պիտի կատարուին նշեալ ծրագրով: Արտադասարանային միւս աշխատանքներուն պէս, The Little Engineer-ի դասընթացքը պիտի սկսի յառաջիկայ շաբաթավերջին: