Յունահայութիւնը սեպտեմբերի երրորդ շաբաթավերջը նուիրեց Հայաստանի եւ Արցախի հանրապետութեանց 25-ամեակի տօնակատարութեանց:
Շաբաթ, 17 սեպտեմբերին երեկոյեան Քոմոթինիի մէջ Հիւսիսային Յունաստանի հայութիւնը, իսկ կիրակի, 18 սեպտեմբերի երեկոյեան Այոս Սոսթիի մէջ աթենահայութիւնը ընդառաջեցին ՀՅԴ Յունաստանի Կեդրոնական կոմիտէին կազմակերպած եւ հայկական զոյգ հանրապետութեանց հիմնադրութեան 25-ամեակին նուիրուած հանդիսութեանց:
Զոյգ հանդիսութեանց ընթացքին օրուան պատգամը տուաւ ՀՅԴ Բիւրոյի անդամ, ՀՅԴ Բիւրոյի Հայ դատի եւ քաղաքական հարցերու գրասենեակի պատասխանատու Կիրօ Մանոյեան, որ իր խօսքը կեդրոնացուց հայրենի հողի վրայ ազատ ու անկախ ապրելու հայ ժողովուրդի անկապտելի իրաւունքին եւ անխորտակելի կամքին վրայ, որոնց փառահեղ վկայութիւնը կը հանդիսանայ Հայաստանի ու Արցախի հանրապետութեանց նուաճած անկախութեան 25-ամեայ ուղին` իր յաղթահարած երէկի դժուարութիւններով եւ ներկայիս դիմագրաւած մարտահրաւէրներով:
Տօնակատարութիւնները ունեցան գեղարուեստական բաժին: